|
|
(ListinDiario) – Presidente di Republica Dominicana, Luis Abinader a manifesta ayera cu gobierno ta bay dispone di tur recursonan necesario, ‘a cualkier costo’, pa garantisa paz y trankilidad di e pais, dilanti e denuncianan di ciudadanonan di indicenan halto di criminalidad.
“Nos no ta bay stop te cu tin paz na cada sector, na cada bario y den cada cas”, e hefe di estado a afirma na periodistanan di Santiago durante un bishita na e provincia ey.
E mandatario a expresa ademas cu ta sigui traha riba e reforma di polis. “Pasobra loke mi no t abay acepta na e pais aki, manera mi a bisa ayera, ta un paz mafioso. Nos a duna e golpinan mas duro na narcotrafico cu nunca a yega di duna, y awo nos ta bay enfrenta e microtrafico”, el a adverti.
Den un comunicado di Direccion di Prensa di e Presidencia, a agrega cu ‘ta bay tin trankilidad den e barionan y nos ta bay logra a cualkier costo’.
Riba diahuebs, presidente Abinader a dispone e activacion di e operativo conhunto “Mi Pais Sigur’, cu accionnan cu Polis Nacional ta bay ehecuta hunto cu e Forsanan Arma. E operativo, cual a desplega for di ayera tardi den tur bario, municipio y provincia di e pais, tin obhetivo di garantisa paz y trankilidad di e ciudadanonan
