Director di Etica y Integridad Gubernamental a anuncia ayera e formacion di un comision integra pa expertonan pa den un plaso no mayor di 90 dia, realisa un riguroso estudio tecnico di e prestacion di Contraloria General di e Republica, cu lo conduci na un reforma profundo di e organo di Estado aki.
Dokter Milagros Ortiz Bosch a significa cu e comision crea pa presidente Luis Abinader tambe mester revisa y actualisa henter e marco legal di e contraloria.
“Comprondiendo cu e pais no por warda te cu aproba un normativa nobo pa duna impulso na e cambionan cu ta rekeri den Contraloria General di e Republica, mi a duna instruccion na e Contralor pa designa dos funcionario di nivel halto pa e desaroyo di e division di investigacion y anti-fraude di e Contraloria y e fortalecimento di e funcion di auditoria interno special”, el a expresa.
E funcionario a splica, den un rueda di prensa na e Palacio Nacional, cu e dos instancia nobo di e Contraloria di e Republica lo inicia, di inmediato, Auditorianan Special y di Investigacion Antifraude den tur institucion di e Estado, cu enfasis riba e nomina publico y contratacionnan publico.
Ortiz Bosch, compaña pa e Consultor Huridico di e Poder Ehecutivo, Antoliano Peralta Romero y e director di Compras y Contratacionnan Publico, Carlos Pimentel, a anuncia un serie di iniciativanan tuma pa presidente Abinader na fabor di transparencia y contra corupcion den e institucionnan di e estado.
El a sostene cu e pais ta avansa den un proceso profundo di auditoria interno di tur institucionnan di e estado dispuesto pa presidente Abinader. “Nos pais tabatin mester di un shock di institucionalidad y modernidad sin precedente”, el a afirma.
A recorda e compromiso cu e mandatario a haci na e pais, di traha pa fortalecimento di e Sistema Nacional di Control Interno y di e Contraloria, como tambe e creacion di un subdireccion antifraude pa inspecciona di forma permanente tur area di gobierno.
El a precisa cu entre e compromisonan adopta pa e gabinete di transparencia ta acelera e procesonan di contratacion; sigura e pago na proveedornan di e estado; y mas importante, yega oportunamente na ken ta e obhetivo fundamental di e politica aki, pueblo.
