(emol.com) –Ayera Conferencia Episcopal di Chile a duna di conoce cu Papa Francisco a dicidi di acepta renuncia di tres obispo Chileno: monseñor Cristian Caro, Gonzalo Duarte y Juan Barros. E ultimo specialmente relaciona cu e encubrimento di abuso sexual dentro di e clero.
E retiro di e obisponan ta bin casi un luna despues cu nan a biaha pa Vaticano pa reuni cu e Pontifice y cu nan tur a pone nan cargo na disposicion. Un tematica cu a acapara atencion di opinion publico na diferente parti di mundo y cu awor atrobe ta bolbe riba portada di mayoria di medionan grandi internacional. Medionan di Argentina, Peru, Reino Uni, Estadonan Uni, y Spaña, entre otro pais, a dedica special atencion na e salida di Juan Barros, awor ex obispo di Osorno, ken a ser acusa pa e victimanan di e sacerdote Fernando Karadima, di encubri e abusonan sexual cu Karadima a comete y cual caso a provoca e intervencion di Papa Francisco, den e crisis institucional di iglesia catolico Chileno.
E versionnan online di e diario Argentino Clarin y di El Comercio di Peru a destaca den nan titularnan e protagonismo di Barros den scandal y con clave su salida ta resulta. Esey acompaña pa un potret unda ta mira Francisco y Barros saludando otro afectuosamente. El Pais di Spaña ta recorda den su publicacion e bishita cu e Papa a realisa na Chile, durante cual el a defende Barros, sigurando cu no tabata existi prueba den su contra. Sin embargo, despues di scucha e victimanan di Karadima y conoce e investigacion den teritorio Chileno di e enviado special di Vaticano, e arsobispo di Malta Charles Scicluna, su opinion respecto e lider di e diocesis di Osorno a cambia radicalmente. “E limpiesa den Iglesia Chilenoa cuminsa tuma forma”, e diario Spaño ta bisa den referencia na e retironan di e momento aki. Mientras tanto, e diario Britanico The The Guardian ta afirma cu e decision di e Papa ta cuadra cu “su continuo esfuerso pa demostra cu el a comprende e alcance di e scandal di abuso sexual den iglesia catolico, y tin e intencion di atende esunnan involucra como perpetrador o complice.”
E portal di noticia di Vaticano, Vatican Insider, a enfatisa e cu e trabao cu e obisponan investigado Scicluna y Bertomeu ta bay mas leu cu identifica responsabilidad di Juan Barros y ta pretende desmantela e “cultura di abuso, encubrimento y psicologia di elite cu ta parce di ta reina na Chile, segun e propio Pontifice a denuncia.”
