Definitivamente gerencia di Triple A no por sigui cu e trabou di renobacion den e sala di yegada di pasaheronan pa construi un tipo di counter pa aloca e car rentalnan den aeropuerto, manera e tabata plania inicialmente.
E trabou aki a ocasiona algun disgusto te hasta accion di parti di funcionarionan di duana representa pa nan sindicato SADA cu a sinti cu e renobacion aki tabata limita nan espacio pa eherce nan trabou di control debidamente den nos terminal aereo.
Ayera mainta presidente di SADA, Edward Maduro a declara na Bon Dia Aruba cu e decision final aki a cay despues cu nan a sostene varios reunion cu un comision institui pa Minister di Finansa, Angel Bermudez. Den e reunion aki ademas di SADA a participa e mandatario en cuestion, gerencia di Triple A y tambe un consehero di minister Bermudez. Den e mesa di combersacion aki nan a bin tuma nota personalmente di e situacion y finalmente nan a tuma e decision di stop e proyecto manera e tabata bayendo. “Tambe nan a sinti cu e no ta bayendo den e direccion unda e lo beneficia e funcionamento di duana”, e sindicalista Maduro a bisa. El a laga sa cu esey tabata e ultimo reunion, caminda e comision cu e mandatario a instala na 2015 mester sigui delibera pa asina bin cu un diseño cu ta mas apto y adecua pa personal di duana por funciona debidamente.
Plannan nobo
Sr. Maduro a bisa cu nan ta participe di e comision aki cu mester bini cu e cambionan pendiente. Ora cu nan ta keda cla asina leu cu e plannan nobo, esaki lo keda presenta na minister Bermudez y pa Triple A. Di otro banda despues di e accion cu nan a yega di realisa tanto pa asunto di e trabou di renobacion den aeropuerto, como tambe e cambionan cu mester tuma luga pa defini e asunto di descripcion di e funcion di personal di aduana, sr. Maduro ta haya cu ainda tin “varios punto cu ta rekeri atencion”. Tur duanero ta practicamente miembro di SADA, pues nan porcentahe ta hopi grandi di miembronan. Pues constantemente nan miembronan tin contacto cu e directiva di SADA y nan ta ripara cu ainda e ambiente di demotivacion t’ey. Maduro a indica cu SADA ta trata di promove e union y e ambiente bon y positivo na pia di trabou.
Ainda e ta haya cu ainda nan no a yega unda nan kier yega como cuerpo di duana. Como sindicato nan tin e trabou di cuida nan posicion huridico di cada trahado di duana. Pero apart di esey nan tin un trabou mas intensivo y hopi mas grandi cu no ta mucho conoci y cu ta para den nan statutonan. “Hopi ta cuestiona ora cu nos ta bin cu nos puntonan dilanti.” A base di nan contacto cu nan miembronan nan ta delinea nan manera di atende cu cada situacion cu ta presenta. Encuanto si SADA ta forma parti di un bloke sindical organisa pa TOPA, sr. Maduro no ta kere cu e ta un bloke sino cu nan a bin hunto mirando cu tin “algun cos” cu a sosode; pero e ta un asunto apart cu tin di haber cu diferente asunto di gobernacion. Pero e ta algo aparte cu na dado tempo pueblo lo haya sa di dje.
