Renobacion di santo na Eagle Beach ta continua y lo sigui den otro beachnan

Den cuadro di mehoracion di e beachnan di Aruba, ayera mainta medionan di comunicacion local a ser convoca na un conferencia di prensa, durante cual a ricibi informacion tocante con e renobacion y mehoracion ta. Tambe a indica cu e renobacion lo sigui tuma luga na diferente beach y patrimonionan.

Director di DOW, Marlon Croes a informa cu prome e santo tabata shinishi y despues a pasa pa un color blanco mas fini, pa di e forma ey e beachnan lo mustra miho, ya cu nan ta forma parti di e producto di Aruba.

Di mesun manera, el a sigura cu den nan agenda nan tin mas beachnan pa mehora den e transcurso di añanan dilanti. Por ehemplo, Fisherman’s Hut, Mangel Halto, Baby Beach y Rodgers Beach, caminda cu na su tempo e grupo lo prepara e trabao pa sigui cu esey.

E inversion pa cu esaki ta entre 50 pa 60 mil florin unda cu e mayoria di trabaonan a wordo haci door di nan, segun Croes a sigura.

Prome minister Evelyn Wever-Croes tambe tabata presente den e conferencia aki, unda el a trece dilanti cu el a dedica algun palabra na e comision di Aruba Amenities y Patrimonionan di Aruba, conhuntamente cu instancianan cu ta forma parti di e comision aki.

Na e momentonan aki, Aruba ta den un otro ola di pandemia Covid-19 cu a surpasa, pero sinembargo durante cada desaroyo di e pais, tin cu keda enfoca riba futuro. Y esey ta loke nan a bin haciendo cu e mehoracion di e beachnan. No obstante di e crisis cu Aruba ta pasando aden, prome minister a señala cu ta importante pa sigui enfoca riba desaroyo di e isla.

Ta casi dos aña cu a crea e comision aki, manera el a bisa, na unda el a splica cu nan ta dedica na atencion di patrimonionan natural y historico. E meta ta pa crea programanan di mehoracion den areanan aki, cu ta areanan facilidad y purba crea oportunidadnan nobo den comunidad.

Prome minister tambe a indica cu den experticionan cu nan ta busca na DOW, DIP DNM, ATA, Ministerio di Cultura, MANA y Departamento di Asunto Economico nan a haya e sinergia cu nan tabatin mester pa nan por logra esaki.

E conferencia di prensa a tuma luga na Eagle Beach caminda cu prome minister a indica cu esaki ta e beach cu ta mas amplio na Aruba, cu a yega di haya reconocemento internacional caba como un di e playanan mas bunita den Caribe y mundo.

Ya caba den Gabinete Wever-Croes 1 nan a aloca fondonan di e presupuesto pa nan por inverti den e trabaonan aki di saca santo blanco for di sitionan di lama caminda cu ta permiti pa DOW, DNM, DIP. Tur di nan a traha riba esaki, unda cu regularmente cada luna prome minister ta haya un update di e trabaonan cu ta wordo haci.

Den e proyecto aki a renoba caba Arashi, Boca Catalina, un parti di Fishermans Huts y Eagle Beach cu na e momentonan aki ta den e fase final.

El a splica cu e trabaonan ta e renobacion di santo blanco, specialmente bao di e matanan di druif cu ta na Eagle Beach, e santo aki a resulta di ta hopi satura y el a cambia hasta di color den e decadanan cu tabatin campamento. Prome minister a sigura cu “lamentablemente nos mes a daña e calidad di santo bunita y e beach akinan”.

Aworaki, nan a inverti den esaki cu trabao cu ta wordo haci pa hopi tempo y cu no ta algo cu ta wordo haci den un periodo di tempo cortico. DOW a percura pa haci e area limpi y por basha e santo nobo riba dje. “Esaki a trece un esfera bunita, masha agradabel, specialmente pa esnan cu ta desea di pasa un dia dushi na lama y sinta den sombra bao di e matanan di druif”, Wever-Croes a declara.

Tambe el a sigura cu ultimo temponan nan ta mira cu e hendenan mester tambe di mas variacion. Specialmente den epoca di pandemia unda cu mester di mas sitio pa distrae di forma sano, “y nos beachnan ta ofrece esaki miho cu tur otro luga. E ta un luga pa nos relaha, nos mehora nos condicion di salud y pa nos disfruta cu nos famianan”.

Sinembargo, na mesun momento cu nan ta renobando e luganan aki, esaki tambe ta trece cune mas responsabilidad. “Nos ta renobando nos patrimonionan di pais Aruba, di pueblo y nos mester aworaki sigur, bay pa dilanti y enfoca con pa cuida nan. Y ta na nos cada un pa conserva e bunitesa di e luga”, prome minister a manifesta.

Prome minister a informa cu e siman aki, e comision cu ta encarga cu e renobacion ta bay lansa un website nobo di DOW, caminda cu nan ta bay cuminsa un campaña di conscientisacion pa cada ciudadano di e pais por sa con pa cuida e beachnan y patrimonionan natural di un manera miho.

Ronella Croes, CEO di ATA, a expresa cu ta hopi importante pa pone atencion riba e desaroyo di e producto turistico di Aruba. Na momento cu ta evalua proyectonan, nan ta mira ki beneficionan esakinan tin pa e comunidad, ki beneficio tin pa bishitantenan y tambe nan ta wak con por mitiga si ta necesario e impacto riba medio ambiente. Y por ultimo ki contribucion economico esaki tambe ta trece cune.

ATA ta bin pone atencion riba desaroyo di producto turistico di diferente manera. Croes a sigura cu pa nan ta importante pa facilita proyectonan unda cu tur organisacion y autoridadnan cu ta carga diferente responsabilidad ta consciente di kico ta importante pa turismo y pa comunidad, pa asina tur ta alinea.

ATA tambe ta responsabilisa su mes pa medio di implementacion di diferente proyecto cu ta na bienestar di desaroyo duradero aki cu nan kier mira. ATA a conduci estudionan conhuntamente cu autoridadnan concerni pa midi e calidad di awanan den zona hopi turistico, nan a tuma accionnan pa remedia te unda cu tin mester. Por ehemplo, pensa riba areanan cu ta den Palm Beach cu tabatin hopi lodo den e santo y te hasta den varios ocasion esey hasta a causa impacto cu e holo cu tin den areanan y cu ta trabaonan cu ta tuma luga durante ultimo añanan.

Igualmente el a indica cu nan a renoba 24 palapa den area di Malmok y Boca Catalina cu tin e intencion pa nan sigui pone esaki tambe den area di Baby Beach y Rodgers Beach, e palapanan aki tin un informacion di tur e reglanan, leynan y comportacion cu ta desea di e bishitante tambe pa di e mesun forma ey turistanan tambe coopera pa nan mantene e beachnan debidamente.

Pa finalisa, el a afirma cu nan tambe ta provee e bari di sushi di diferente areanan y e coleccion di desperdicio cu ta genera.