E renobacion di pier di Spaans Lagoen ta avancando rapido y ta hayando bon comentario di parti di piscadonan y publico general. Despues cu algun siman pasa a anuncia e trabou, awo ya caba por mira mas of menos mita di e pier den un estado renoba y cu mehoracion pa sigura e durabilidad di e facilidad pa piscadonan di e area.
Pier tabata den mal estado:
E pier cual su construccion ta data di mas di 20 aña atras a ser construi e tempo aya door di APA NV como contribucion na e comunidad di piscado. Desde e tempo ey, clima y uzo diario a tuma un costo riba e pier, unda esaki a bay atras cu tempo y desgaste. Ya pa casi 5 aña sr. Alex Farro tabata boga pa e renobacion di e pier pero door di varios motibo no a logra esaki te recientemente.
Grandi tabata su alegria ora 11 di november ultimo e por a mira e trabounan cuminsa na e sitio cu kitamento di e structura bieu. Unabes cu a kita e parti ariba a bira ainda mas evidente e peliger grandi cu e pier tabata aden. Un poco mas y por bisa cu e lo a cay aden por completo.
Pronto lo ta renoba completamente:
E trabou ta ya caba awor casi mita di e pier y e mehoracion ta bisto. Nochi y dia si kier haci e comparacion. Piscadonan ta dunando bon comentario y tur cu a mira e avance ta positivo pa cu e cambio. Ta premira cu denter di 1 siman mas e lo ta casi cla.
Ta sigui cu inversion:
Di e forma aki Fundacion Centro di Pesca Hadicurari ta sigui cumpli cu su meta den yuda piscadonan di henter Aruba. Hadicurari ta orguyoso di inversionnan den facilidadnan di piscado. Entre esakinan a renoba e pier di Hadicurari, a traha un pier y berghok na Spaans Lagoen, a construi e pier na Waf di Oranjestad, a renoba parti di e pier di Cura Cabay, a renoba un pier na Colony y awor ta renobando e otro pier na Spaans Lagoen. Tur esaki ta posibel na cooperacion di gobierno cu ta pone confiansa pa e fundacion maneha (beheer) e facilidadnan, e piscadonan cu ta coopera y varios otro instancia cu ta contribui cu e fundacion sin fin di lucro cu ta existi desde 2006.
