E proyecto di renobacion di e facilidad di refineria pa converti esaki den un facilidad pa gas ta algo cu lo dura rond di dos aña. Pa esaki e team di Eagle LNG cu a haya e proyecto a reuni diferente biaha caba cu DTI.
Presidente di Eagle LNG, Shaun Lalani, kende tabata na Aruba a splica pakico tin asina cautela cu e contracto pero tambe kico e proyecto aki ta nifica pa Aruba. Tanto Merca como Alemania ta instalando planta di energia di gas pa simplemente balansa nan sistema local den uzo di combustibel.
Lalani a splica brevemente e motibo pakico nan a pidi cautela pa loke ta contenido di e contracto. “Nos ta den un industria competitivo, unda cu Eagle LNG ta competi cu hopi otro compania. Hopi di e detayenan ta sensitivo pasobra e ta afecta nos posibilidadnan pa competi na otro luganan manera Corsou, Boneiro, Sint Maarten, Antigua, Bahamas, etc. Esey ta e motibo cu nos ta hopi sensitivo pa cu e detayenan. Si por bisa cu nos tabata hopi flexibel cu WEB den e negociacionnan. WEB a lucha hopi cu el a logra un prijs hopi competitivo. Nos mester ta cauteloso den nos detayenan pa e no afecta nos posicion di competencia riba e mercado en general.”
E ingenieronan di Eagle LNG tabata di bishita diferente biaha na Aruba pa entrevista contratistanan, ingeniero y varios compania di construccion. “Nos ta optimista cu e companianan aki lo por provee e productonan cu nos mester pa Aruba y pa nos facilidadnan den exterior. Nos preferencia ta pa crea cuponan di trabao pa hendenan local.”
Nan ta calcula cu e proyecto ta encera 40 mil ora laboral cu ta rond di 100 cupo di trabao den e periodo di construccion, Y na e momento piek por papia di 200 cupo di trabao. E operacion lo cuminsa cu 10 pa 20 persona profesionalisa den e area y cu crecemento e cantidad di cuponan di trabao lo aumenta tambe.
