Gobierno a presenta presupuesto complementario na Parlamento di Aruba dia 25 di juni ultimo. Prome minister Evelyn Wever-Croes a indica cu mester a haci varios cambio den e presupuesto debi cu tin mas entrada cu loke a premira pa aña pasa. Den esey, Ministerio di Finanzas y Cultura a aloca 4 miyon florin pa renobacion di Cas di Cultura.

Sinembargo, den rapport di Raad van Advies tocante e cambionan haci pa presupuesto 2024 ta trece dilanti cu costo di subsidio di Departamento di Cultura a aumenta ocasionalmente cu 4 miyon florin mas pa renobacion di Cas di Cultura, aunke nan ta señala cu den presupuesto 2024 no ta inclui nada riba un posibel renobacion di Cas di Cultura. Gobierno ta considera deseabel y/of necesario cu esaki mester tuma luga e mesun aña aki.

Debi na e considerabel aporte involucra pa esaki y e intencion, no a discuti e renobacion den e proyecto di presupuesto 2024. Raad van Advies ta considera haya un splicacion, incluyendo e necesidad di e renobacion aki. Ademas, nan a puntra con ta determina e prioridad di proyectonan grandi di mantencion y renobacion, referiendo entre cos, na problemanan cu tin di haber cu RWZI.

Pa esaki, a señala cu edificio di e teatro, e teatro y e centro cultural di Aruba (Cas di Cultura) for di varios aña caba ta den condicionnan deplorabel (incluyendo e beton putri). Te e fecha no a dispone fondonan pa un renobacion cu lo por ascende 12 miyon florin. Fundacion di teatro Aruba cu ta esun encarga di maneha Cas di Cultura no por recauda fondonan na otro luganan si Land Aruba no ta aporta un cantidad minimo.

Tambe a ser treci dilanti un posibel ciere di Cas di Cas di Cultura si no ta dispone di fondonan den corto plaso. Pa por recauda fondonan na otro luganan, ta necesario cu gobierno tambe por contribui na e renobacion. E cantidad di placa cu tin mester pa esaki ta 4 miyon florin pa asina renoba scenario y accesonan di Cas di Cultura.

No ta un secreto cu for di basta tempo caba mester a presenta un plan di renobacion di edificio di Cas di Cultura, incluso esaki a ser treci dilanti na 2015 ora Vicky Arens director di Cas di Cultura a anuncia cu tabatin mester–den e tempo ey–150 mil florin pa por renoba Cas di Cultura, unda a haci diferente evento manera “Charity Show & Auction” cu tabata pa salvaguardia Cas di Cultura y financia e master plan arkitectonico.

Arends, na e tempo ey a splica pakico tabatin mester di un master plan arkitectonico cual ta pa motibo cu, Cas di Cultura su edad ta hopi halto.

Na 2021, Arends a tene un conferencia di prensa riba e reunionnan cu tabata tuma luga cu stakeholders riba formacion di gobierno pa Aruba. E biaha ey, formador Evelyn Wever-Croes a reuni cu stakeholdernan den sector migracion, social y cultura. Durante e conferencia di prensa, Vicky Arends di Cas di Cultura a duna informacion riba e desaroyonan den e instituto aki.

Arends a cuminsa expresando su speransa cu maske el a papia hopi lihe durante e reunion, formador Wever-Croes y henter e delegacion por a compronde e proposito di Cas di Cultura, indicando cu a haci hopi trabao caba pero ainda ta bezig cu renobacion.

Cas di Cultura ta ‘e unico teatro prosenico na Aruba y den Caribe Hulandes’. “Nos ta spera cu den e termino aki por yuda nos. Principalmente habri porta, pasobra esey ta loke nos a pidi letterlijk, pa habri porta pa nos pa fondonan na Hulanda, Europeo, fondonan local, Lotto, etc. pa nos por yega na fondo pa porfin nos por renoba”, Arens a comenta na 2021.

Arens a clarifica cu mientras nan tabata wardando pa haya fondonan pa renobacion, si nan tabata bezig cu mantencion di e edificio pa esaki ‘no bay atras’. “Renobacion mes ta algo hopi mas detaya, mas profundo. No solamente ta renoba, sino ta pensa tambe riba e necesidadnan di comunidad pa cu un cas mas amplio, cu diariamente bo por haci algo na Cas di Cultura. Y no solamente esey. Ora bo crea un luga bo mester pensa riba explotatie tambe y ‘streams of income’. Tur esey nos a incorpora y pone den un plattegrond eigenlijk full otro.” Pues lo cambia e interior di e edificio, y lo mira algun cambio pafo.

Pa e renobacion, Arens a indica cu nan tabata wardando pa fondo pero nan tabatin e plan cla caba. “Pasobra nos tabatin un suma caba dos aña pasa, pero ora Covid a dal nos den porta pa cuminsa cu recaudacion, nos a bisa cu nos ta bay haci e plan mas chikito”, el a splica. “Kiermen nos a reduci e plattegrond cu nos tabatin. Pero a zorg pa nos mantene e funcionalidadnan extra cu nos kier brinda na Cas di Cultura pa e ta un sala diario pa henter comunidad.”

E renobacion actual cu Gobierno di Aruba a trece dilanti den su presupuesto complementario 2024, por ta un bon noticia mirando cu Cas di Cultura pa un tempo largo no a haya su merecido atencion y ta e Centro Cultural di Aruba, unico espacio for di aña 1958 unda comunidad ta reuni pa actividadnan cultural, artistico y creativo di Aruba.

Algun potret ta pertenece na Cas di Cultura su Facebook page.