Dia 23 di october ultimo, den un conferencia di prensa extraordinario Gobierno di Aruba a anuncia cu a duna un splicacion amplio riba e regla di presupuesto den caso di “meevallers”, cu ta fondo adicional cu no a ser anticipa e cual 50% ta bay ser usa pa paga debe y 50% pa inverti den proyectonan di e ministerionan.

Den e conferencia, prome minister Evelyn Wever-Croes a sigura cu esaki ta pa motibo cu oposicion ta cuestionando unda pa inverti e placa di surplus cu tin den e presupuesto supletorio 2023.

Prome minister tambe a señala cu tin obligacionnan financiero y palabracionnan haci cu Hulanda, y na momento cu tin “meevallers”, e suma di placa ey no por ser usa na loke Gobierno ta desea. E regla di presupuesto ta indica cu den casonan asina, minimo 50% di e placa mester bay na paga debe, y 50% por bay na inversion den proyectonan.

Despues cu departamento di Finanzas a actualisa e cifranan conforme nan realisacion, por mira cu e surplus a bira 1.8% di e GDP, cu ta ekivalente na 50.2 miyon florin, Di e manera aki 50%, cual ta suma 25.1 miyon ta destina pa paga debe, y e otro 50% ta bay pa por haci extra inversion den aproximadamente 15 proyecto cu ta bay ta evalua pa un comision di Departamento Economico y Departamento di Finanzas, nan ta scrutina nan y ta fiha un prioridad conforme necesidad, manera ta stipula den e reglanan presupuestario, nan a enfatisa cu e placa aki no por tin como destino AZV, onderstand y of salario, debi na e reglanan di presupuesto cu nan mester cumpli.

Ministerio di Asuntonan General
 Prome minister Evelyn Wever-Croes encarga cu e cartera aki a señala cu nan ta bay inverti como por ehemplo reemplaso di computer na Departamento di Recurso Humano cu lo yuda pa e funcionamento mas agil di e departamento.

Na parlamento, e parti patras di e edificio di parlamento ta bay ser remodela completamente. Ta trata aki di oficinanan di Parlamento.

Na Wilhelmina Brug cu actualmente ta den hopi mal estado, lo ser drecha y remodela.

Juliana Brug cu tambe ta den estado precario, lo wordo drecha y remodela.

Kadaster y DTI tambe ta bay haya atencion debido.

Y segun tambe a informa, ta bay asfalta camindanan cu tin mas prioridad y ta den mas mal estado, cu ta ser frecuenta pa mas tanto hende y cu, segun e criterionan, ta den estado di peliger.

Ministerio di Transporte, Integridad, Naturalesa y Asuntonan di Adulto Mayor
 Pa loke ta trata presupuesto aloca pa Ministerio di Transporte, Integridad, Naturalesa y Asuntonan di Adulto Mayor ta un suma di 7. 3 miyon florin, den esaki, minister Ursell Arends a enfatisa cu e fondonan ta bay ser inverti den capital humano, subrayando e necesidad di duna na e grandinan e cuido digno cu nan merece.

3.3 miyon florin lo ser usa pa paga e trahadonan di SABA pa asina sigura cu e placa no ta bay ta utilisa pa otro cosnan prome cu yega na nan, for di 2008 nan ta bogando pa nan rechttrekking na unda e palabracion cu e sindicato segun minister Arends mes a menciona, e biaha aki nan ta bay paga directamente na trahadonan pa garantisa cu e fondo aki si lo yega na trahadonan.

3.9 miyon lo bay na e mehoracion di cuido pa nos Adultonan Mayor, unda a informa cu ta bay habri un di dos Cas Marie cu dag-opvang pa adulto mayor cu ta sufri di dementie/alzheimer.

El e trece dilanti cu ora e fondonan lo ta disponibel, nan tambe ta bay atende cu debenan cu tin cu salario di trahadonan di Arubus y Serlimar.

Ministerio di Husticia y Asuntonan Social
 Minister Rocco Tjon encarga cu e parti aki a señala cu a haya 5 miyon florin pa renoba totalmente e post di departamento di Bombero ubica na aeropuerto denomina “Oscar,” ademas nan ta bay amplia e siguridad na e Centro Ortopedagogico ya cu for di algun tempo caba trahadonan y hobennan residencia den luga aki ta solicitando mas siguridad.

Segun e planning, e trabounan aki ta bay cuminsa na maart 2024 y lo caba na fin di aña ey.

Ministerio di Enseñansa y Deporte
 A presenta un proyecto for di cuminsamento di e aña aki pa un scol nobo pa Juliana School cu for di 2016 a ser cera y awor a presenta un plan pa scol aki por haya un edificio otro aña.

Pa esaki, minister Endy Croes a comenta cu nan a involucra trahadonan di Juliana School pa haya un proyecto mas innovativo, manera el a sigura.

Mon Plaisir College na 2020 tambe a inicia cu un proyecto dos aña pasa pa HAVO na unda e prome fase solamente a logra concretisa pa motibonan di fondo, pa logra e di dos fase y caba scol completo mester di inversion di 2.6 miyon e cual tambe ta poni como un di e proyectonan cu lo haya atencion.

Minister di Turismo y Salud
 Minister Dangui Oduber a splica cu nan tin un inversion grandi haci den proyectonan cu ta tumando luga na e momentonan aki y otronan cu lo cuminsa na 2024 pa atrae e turista afluente cu e vision di High Value Low Impact pa haci inversionnan di upgrade e producto Aruba manera Master Plan Sero Colorado, embeyecemento na Mangel Halto y Eagle Beach, Boardwalk Malmok fase 3 y 4, Mountainbike, Aruba Port Authorithy, Welcome Plaza cu ta bay bira Welcome Festival Plaza, y e proyecto Getaway 2030 cu un inversion di mas di 140 miyon dollar den e prome fase lo keda cla e otro aña.

Pa loke ta trata ministerio di Asuntonan Economico, Comunicacion y Desaroyo Sostenibel di Geoffrey Wever y Ministerio di Energia y Labor di Glenbert Croes, no a duna hopi detaye di cuanto cada ministerio a haya y kico ta e proyectonan cu nan ministerio lo ehecuta cu e maneho aki, lo ta bon pa nan por informa comunidad tocante esaki.

Ta bon pa resalta cu na Aruba mester inverti den loke ta trata problemanan social manera personanan cu ta bira adicto, cu ta comete actonan ilegal manera esnan cu ta den Caya Grandi y area di Playa, por ehemplo.