Renee Servello ta un persona yen di bida, harimento y amor pa Aruba. Awo, e ta cla pa comparti tur esaki cu henter mundo. E ta un persona cu ta siña nos cu nunca ta laat pa nos purba algo nobo y cu humor ta tur caminda.

Aña pasa, via Aruba Today a ser conoci cu Renee y su casa Anthony Servello. Nan ta un pareha cu tin mas di 27 aña ta bishita Aruba consecutivamente, pues nan ta considera Aruba un di dos cas. Renee a conta cu “inicialmente nos a bin cu un pakete y nos a keda pa dos aña,” el a conta. “E di dos aña cu nos tabata aki, nos tabata lesando corant y nos a mira cu otro hotel lo habri pronto, y pa motibo cu ami y mi casa tabata miembro di e hotel nos a core bay y cambia di hotel.” Ora cu nan a yega e hotel, nan a conoce e manager general y a ricibi un tour. Durante e tour aki, Renee ta conta cu el a sugeri pa nan crea un timeshare y eventualmente esaki a keda construi.

Loke ta haci Aruba un luga asina special pa Renee ta su relacion special cu e ta forma cu e hendenan. “Bo por bay otro islanan, pero e habitantenan no ta mesun amistoso. Bo ta tende tur hende ta bisa cu Aruba ta un isla hopi amistoso, pero esaki realmente ta berdad. Nos a yega di bay varios pais, y berdaderamente e ta un luga amistoso. E ta manera un cas pa nos!”

Renee ta un persona cu ta mira humor den tur cos y probablemente e lo skirbi tur e cosnan pret cu pasa durante e dia. Antony, su casa, a conta nos cu nan cashinan na cas ta yen di papel y carchinan unda Renee ta skirbi storianan pret, cual eventualmente a resulta den su di dos buki, Humor All The Way. Sinembargo, el a traha den benta pa 30 aña y “pa motibo aki nunca mi por a enfoca riba loke di berdad mi ta stima,” el a comenta. “Pero mi tabata skirbi, ora mi tabata biaha a causa di mi trabao, den avion mi tabata skirbi tur e cosnan pret cu mi tabata mira, y mi tabata keda warda nan den mi cashi te ora cu mi a bisa Anthony ‘suficiente! Mi kier skirbi tur e cosnan kens cu ta ponemi hari!’, y asina mi a cuminsa skirbi atrobe y mi a pensa ‘esaki lo por ta un buki.’”

Renee su filosofia ta cu humor ta e medicina pa bida. “Den mi cabes, esaki ta loke ta yudabo sigui dilanti. Mi no ta polyanna. Tur hende ta experiencia perdida den na bida. Te hasta ami. Mi a perde mi tata cu solamente 4 aña,” el a comparti. Sinembargo e ta kere cu enfoca riba e cosnan chikito, positivo, pret y bunita den bida. “Mi no ta hari na ningun hende cu tin perdida of malesa, paso nos tur tin esaki den nos bida y famianan. Pero, si bo por, busca algo pa hari di dje. E ta yuda hopi,” el a expresa. “Mi ta kere e ta yuda bo curpa si bo por hari y disfruta di bida un poco.

Manera nos a menciona, Renee y Anthony ta bin Aruba tur aña y e aña aki no ta un excepcion. E aña aki, Renee y Anthony a bolbe back Aruba y e biaha aki nan ta bin cu nan yiu homber Ty. Despues di su dos bukinan anterior, e aña aki Renee a trece e bunita noticia cu el a saca dos buki mas y e biaha aki buki pa mucha, cu storianan sumamente bunita manera “Petey the Pug Escapes for 24 hours” y “Freckles finds a Forever Home.”

Aña pasa nos a haci Renee e pregunta si e tabatin algun storia di Aruba y Renee a confirma cu si, “Claro! Well, mi tin cu clarifica cu e storianan cu mi tin di Aruba lo sali den mi proximo buki.” Pero, el a comparti cu nos un di e varios storia cu tin y awe nos lo comparti e storia cu boso tambe.

“Durante nos prome aña nos tabata hopi contento cu boso tabatin e wielnan di keshi Hulandes aki. Eora nos a dicidi – no, ami a dicidi, Anthony no tabata involucra – pues ami a dicidi, ‘tur hende na cas mester un wiel di keshi di Hulanda. Mientras Anthony tabata den baño, mi a empaca 5 wiel di keshi den nos maleta y nos tabata den pura pa yega hotel. El a bira puntrami ‘Renee, dicon mi maleta ta asina pisa?’ y mi a conteste ‘Mi no sa. Nos no tin tempo pa discuti esaski nos tin cu yega airport.’ Tur cos a bay bon y nos a yega Miami, y esaki tabata e aña unda ora bo baha for di avion bo maleta tin cu pasa door di e mashin di x-ray. Ora nan a pasa nos maleta, nan a evacua henter e sala menos anos. Nan a yama mi casa y nan a puntre ‘meneer, kico bo tin den bo maleta?’ y el a contesta ‘mi no sa, puntra mi casa, e ta esun cu a empaca e maleta’. Eora e agente di siguridad a bira bisami ‘ta mustra cu bo tin bom den bo maleta,’ mi a core bisa no, no, no, keshi Hulandes! Nan ta wiel di keshi Hulandes y tin 10 di nan!’ Mi casa no a papia cumi pa 10 dia despues di esaki!,” Rennee a conta na harimento.