Algun siman pasa e lider di MEP a lansa un acusacion baho pero sin presenta niun prueba.
El a bisa cu gobierno di AVP lo a saca 61 miyon florin for di fondo di pensioen. Lider di fraccion di AVP sr. Marlon Sneek y miembro di fraccion Rene Herdé a exigi e lider di MEP mes ora pa e presenta e prueba di loke el a bisa. Te awe ainda e lider di MEP no a presenta nada pa prueba loke el a bisa, pero e ta rabia masha hopi ora hende bis’e cu e ta gaña.
Gañamento a bira algo normal Mientras cu nos ta renobando e forma di debati opinion y plannan den politica den nos pais, mientras cu nos ta spera cu tur politico ta comporta transparente y para pa loke e ta bisa, den e partidonan di oposicion, en particular den MEP, nan ta sigui cu e mal custumber di bisa kico cu ta y spera cu hende ta kere nan. Nan ta sigui hunga cu sentimento di pueblo na luga di papia palabra cla y berdad. Nan ta sigui lansa tur sorto di storia cu nan mes a inventa contra AVP, pero sin niun prueba.
E caso di e placa cu nan ta bisa cu a saca di e fondo di pensioen ta djis un di nan. Pero hende ta corda e storia cu MEP a bisa cu nan tin 7 compania cu kier a habri e refineria, pero niun a yega di presenta. Nan a bisa cu nan tin compania pa habri 5 hotel di 5 strea na Baby Beach y Roger Beach, pero nunca nan a presenta. Nan a bisa cu nan lo presenta ley pa proteha mucha contra abuso, y nunca nan a presenta uno. MEP a bisa cu tin cu hisa e edad di pensioen na 65 aña y despues MEP a purba haci como si fuera cu nunca nan a bisa esey. E gañamento den MEP ta asina un mal custumber y malesa, cu di berdad bo no por confia den nan palabra. Awor ainda ta warda pa haya e prueba di loke e lider di MEP a bisa over di e placa cu segun e lo a saca di e fondo di pensioen. Nos ta dun’e un tiki tempo mas pa e para pa loke el a bisa. Si no, atrobe nos lo gar’e ta gaña!
