Ayera mainta algun trahado di IBiSA a welga. E motibo pakico Trahadonan Organisa di Sector Publico di Aruba (TOPA) a saca e trahadonan, ta pasobra tin un mal contento entre e trahadonan, president di sindicato, Sr. Rene Bernabela a indica na Bon Dia Aruba. Tin un Comision di Keho cu tabata traha riba e proceso pa sondea y busca hende den IBiSA mes pa algun posicion, pero awor minister di deporte a bin cu algun persona pa haci esaki. E sindicato TOPA y trahadonan di IBiSA no ta di acuerdo cu esaki y ta pidi minister Alex Schwengle pa sinta hunto y pa papia riba loke ta pasando.
E trahadonan di IBiSA cu a solicita pa cierto posicion a cana e proceso di Comision di Keho pero a dura un tempo bastante largo prome cu a haya un contesta, e sindicalista a indica. “Finalmente ora cu Comision di Keho a duna rason na varios empleado di IBiSA, awor ta resulta banda di e Comision di Keho minister Schwengle, kende ta encarga cu deporte, ta nombra of ta busca otro personanan cu no tin nada di haber cu e Comision di Keho,” el a indica. E personanan aki ta duna resultadonan banda di locual ya un Comision di Keho a duna, cu ta e aprobacion di esunnan cu a ricibi esaki trahando na IBiSA.
No ta di acuerdo
E sindicato tin un desacuerdo total cu a bin cu otro personanan cu no tin nada di haber cu e comision. No por ta asina, cu pa ley tin un comision cu a wordo instala cu tabata tin simannan largo di trabou cu a wordo haci. Nan a tene entrevista di cada personal cu ta traha na IBiSA. Na momento cu a sondea cada personal cu a solicita pa e funcion cu nan a solicita, awo minister Schwengle ta busca otro persona banda di e comision aki, pa nan vocifera nan opinion di cada persona apart riba nan mes. “Esaki ta algo condenabel y p’esey e trahadonan ta para pafo na IBiSA, pasobra ta mustra nan malcontento,” Sr. Bernabela a bisa Bon Dia Aruba.
Un di e personanan cu a wordo declara di no ta bon pa e posicion ta haya un carta. Den e carta aki tin cantidad di mentira cu no ta cuadra cu e realidad, segun e sindicalista. Den e carta aki unda cu minister Schwengle of esunnan banda di e minister a pone den e carta cu e persona no a cumpli cu cierto rekisitonan no ta cuadra.
Tuma contact cu minister
“Na e momentonan aki nos a purba di tuma contacto cu minister Schwengle, pa nos por bay den reunion di caracter urgente cun’e. Esaki ta pa nos puntra minister, cua ta e motibo caminda e por hustifica e decision cu a wordo tuma cu un otro grupo di persona banda di e Comision di Keho pa tuma un decision descabeya di e forma aki,” el a indica. E sindicato a tuma contacto cu Sra. Dorley di oficina di minister Schwengle pa mira si por haya un reunion cu e mandatario.
E sindicalista ta kere cu den e caso aki, minister Schwengle a tuma un decision descabeya di a nombra otro personanan banda di un Comision di Keho cu a fiha, a duna su punto di bista riba cada persona cu nan a entrevista di cual nan a aproba pa e posicion cu nan a solicita. “No ta keda nos nada otro di wak e caminda huridico mester wordo cana pa contra aresta e decision cu gobierno, minister Schwengle, a tuma den e caso aki,” el a sigui bisa Bon Dia Aruba. E decision cu minister Schwengle a tuma pa e sindicato esaki ta algo inaceptabel pa e miembronan di sindicato TOPA.
