Pa varios siman sindicato TOPA tabata mira e situacion social y financiero na Venezuela ta deplorabel na e momentonan aki, nan a cuminsa preocupa un tiki cu e situacion na e Venezuela mirando cu Aruba ta cerca di e peninsula di e pais y mirando tur e dianan cu ta pasando unda den oranan di atardi y anochi, ilegalnan ta yegando via costanan di Aruba. Asina cu e ilegalnan yega, nan ta disparce. Pero segun president di sindicato, Sr. Rene Bernabela, tin un plan pa converti Centro Deportivo Betico Croes den un shelter y cu e sindicato tin den nan poder un documento.
“Nos como parti di sindicato TOPA a puntra gobierno den varios ocasion via medionan social kico ta e plannan di contingencia cu gobierno tin dado caso esaki yega na un forma espantoso, caminda pueblo di Aruba ta haya nan cu cantidad di hende den un forma di bisa refugiado ilegalnan ta yegando den un forma masal riba nos,” segun e sindicalista. El a sigui indica, cu nan no tabata hayando contesta di parti gobierno riba esaki.
Documento di renobacion
Den nan box a cay un documento sumamente importante. Nan a tuma nota cu den un reunion cu tabata tin y e sindicalista ta supone cu esaki tabata encuanto di renobacion di Centro Deportivo Betico Croes. Durante e reunion aki ariba e aspecto di renobacion di e luga aki, ta wordo papia cu esaki mester wordo renoba. Despues di e renobacion mester cambia e formato deportivo pa un shelter, segun Sr. Bernabela. “Esaki seguramente a hala nos atencion. Mirando e echo cu ya caba nos ta bin ta vociferando for di basta dia caba riba e plan di contingencia di gobierno. Kico ta nan plannan, na dado momento cu e asunto social na Venezuela mester sali for di man,” el a indica.
Gobierno tin cu splica
Si cantidad di hende di Venezuela mester yega Aruba, no tin un punto central pa informa pueblo ni unda lo bay ubica e hendenan aki. Pa e sindicato ta sumamente serio ora cu a tuma nota di e documento aki unda cu kier converti Centro Deportivo Betico Croes den un shelter. “Gobierno tin cu bay duna pueblo di Aruba, sindicato TOPA, un splicacion riba con nan a yega na e idea di converti of kier converti Centro Deportivo Betico Croes den un shelter,” e sindicalista a vocifera. Tambe nan ta puntra dicon net Centro Deportivo Betico Croes.
Situacion preocupante
Pa TOPA esaki ta un situacion preocupante y nan tur ta di acuerdo cu esaki. Pero mester por sondea e aspectonan aki miho. Mester por tin un sistema logistico, tur partner mester ta envolvi caminda cada un lo mester duna informacion y comparti cu otro informacion con lo bay atende dado caso si esaki bay for di man. “No por ta asina cu gobierno ta sconde informacion pa pueblo. Y aworaki via documentonan cu a bin den nos poder, nos ta bin haya y lesa cu kier cambia Centro Deportivo Betico Croes pa un shelter,” e sindicalista a bisa.
ASU ta na altura?
Segun Aruba Sport Unie (ASU) e Centro Deportivo ta bira un shelter ora cu mester. A puntra Sr. Bernabela si TOPA sa si ASU ta na altura di e documento aki. “Den e caso aki esey ta un bon pregunta. E sindicalista a indica cu no por ta posibel cu ASU cu ta representa cantidad di deporte aki na Aruba na momento cu nan tabata tin e mesun documento cu mi ta papiando di dje nan dilanti y por a tuma nota di esaki. Pakico ASU no a conseha gobierno otro, si esaki ta e ultimo alternativa cu tin cu bay cambia e postura di Centro Betico Croes pa un shelter,” e sindicalista a bisa. Esaki ta nifica cu otro palabra lo bay ubica e masa di hende na dado momento si esaki bay for di man ful den Santa Cruz, el a indica. “No tin un coordinacion con esaki lo wordo haci precisamente. E parti mas importante locual nos ta cuestiona e pueblo. E pueblo te na e momentonan aki no a wordo informa debidamente kico ta e plan di gobierno. Pero simplemente nos por a tuma nota den medionan di comunicacion cu diferente boto ta yega, hende ta drenta via costa, nan ta disparce aki na Aruba sin sa kende e hendenan aki ta, si nan ta yega cu malesa, hendenan sicario cu ki intencion nan ta bin akinan. Pa nos papia mes riba e tereno laboral ki esey ta bay haci efecto riba e salario minimo cu tin aki na Aruba,” Sr. Bernabela a indica.
