Na principio di e luna aki Prome Minister, Evelyn Wever-Croes, a anuncia durante un conferencia di prensa cu e representante pa Aruba den Raad van Staten, Sra. Milly Schwengle, a tuma su retiro despues di seis aña.
Raad van Staten ta e Conseho di Estado di Reino cu ta duna conseho na gobierno Hulandes no solamente ariba tur nan leynan, pero nan ta duna conseho tambe ora ta trata temanan cu tin di haci cu Aruba.
Prome Minister a splica cu Aruba su miembro den Raad van Staten, Sra. Schwengle a entrega su retiro, despues di a seis aña, pa bay haci algo diferente.
El a indica cu Aruba tabata bezig cu e miembro nobo cu lo reemplasa Sra. Schwengle cu lo tabata riba agenda di Rijksministerraad (Conseho di Minister di Reino) proximamente.
E persona cu lo remplasa sra. Schwengle, el remarca,, lo por asumi e cargo aki unabes cu Conseho di Minister di Reino y tambe Rey Willem Alexander duna su aprobacion y despues lo anuncia esaki.
Ayera a traves di un comunicado di prensa, Prome Minister a informa cu ayera mainta durante e reunion di Conseho di Minister di Reino, a aproba Sr. Rendolf (Andy) A. Lee, como e siguiente miembro pa Aruba den Raad van Staten y lo ta asumiendo su rol cuminsando prome di januari 2024.
Den e comunicado e mandatario ta remarca cu mirando e trayectoria profesional di sr Lee, representantenan di un comision independiente, a bin na e conclusion cu e lo ta un bon candidato pa por representa Aruba.
Basa riba e recomendacion aki, Conseho di Minister di Reino, durante e reunion ayera mainta a aproba su nombramento.
Den e comunicado ta splica cu Sr. Lee ta un politicologo cu tin mas di 30 aña di experiencia den sector publico y semi-publico na Aruba, Corsou y Washington. Tambe, e tabata miembro y presidente di Parlamento entre 2009 y 2010. Despues el a fungi como Minister Plenipotenciario na Washington pa Aruba, como consehero di Prome Minister entre 2018 y 2020, y a traha na Banco Central.
