Banco Central di Aruba (BCA) a publica e “State of the Economy” pa e di tres trimester di 2022. E publicacion ta contene e desaroyonan economico domestico como tambe internacional. E puntonan mas importante ta presenta abao.

Den e prome nuebe luna di 2022, economia di Aruba a crece cu 12,1 porciento compara cu e mesun periodo den 2021. Un rendimento solido den turismo, den termino di cantidad di turista y ingreso turistico, a causa principalmente e crecemento registra den producto domestico bruto (PDB) real. Ademas, indicadornan di consumo y inversion a mustra di ta mas tanto positivo, contribuyendo asina na actividad economico.

E industria turistico na Aruba a registra un crecemento substancial den e cantidad di turista (+44,0 porciento) y tambe den e cantidad di anochi cu turistanan a permanece (+40,9 porciento) den e prome tres trimester di 2022. Compara cu e prome nuebe luna di 2019, e cantidad di turista a recupera cu 96,2 porciento, mientras e cantidad di anochi cu turistanan a permanece na Aruba a recobra cu 94,5 porciento. E aumento fuerte den e cantidad di turista, debi primordialmente na e mercado Mericano, tabata evidente den e prestacion di e sector hotelero (Tabel 1.). Un demanda mas halto di turismo a eleva e ocupacion hotelero y e tarifa promedio diario pa camber. Consecuentemente, ingreso di camber disponibel y ingreso turistico[1] (registra na banconan comercial) a mehora. Data riba “otro tipo di acomodacion”[2] tambe a mustra un desaroyo positivo durante e prome nuebe luna di 2022. E tipo di acomodacion aki a registra un subida mas robusto compara cu hotelnan “high-rise”, “low-rise”, y timeshare. E recuperacion gradual den turismo crucero a contribui tambe na e rendimento turistico den e periodo di analisis.

Indicadornan di consumo a brinda un bista principalmente positivo riba e prome nuebe luna di 2022 compara cu e mesun periodo di e aña anterior (Grafico 1). Ingreso relata na BBO y BAVP y alabes impuesto riba mercancia a registra un aumento. Compara cu e mesun periodo di 2019, BBO y BAVP a expande, mientras impuesto riba mercancia a keda atras. E desaroyo positivo den BBO, BAVP y impuesto riba mercancia, compara cu 2021, a refleha e rendimento fuerte y continuo den e sector turistico, e consumo domestico relata na turismo, y prijs mas halto pa bienes y servicio. E desaroyonan ultimo menciona, na nan turno, a conduci na un extension di e deficit comercial[3] (+25,9 porciento).

Den e periodo di analisis, indicadornan di inversion a mehora. Sinembargo, un parti ta refleha inflacion. Por ehempel, e balor nominal di material di construccion importa a crece. Di otro banda, e peso importa di material di construccion (un proximacion pa e balor real) a disminui compara cu e prome nuebe luna di 2021. Similarmente, e crecemento di e peso importa di metal basico y esnan deriva di metal basico, banda di e peso importa di mashin y ekipo electrotecnico, tabata mas chikito cu e aumento den nan balor nominal. Di otro banda, durante e prome tres kwartaal di 2022, hipoteca extendi na comercio y pa vivienda a aumento substancialmente compara cu e prome tres kwartaal di 2021.

Na fin di september 2022, e indice di prijs di consumidor (CPI) a marca 106,2; un subida di 7,0 porciento compara cu e mesun periodo di 2021. Aumento den e componentenan di vivienda y transporte, ademas di e expansion continuo den cuminda y bebida no-alcoholico, a ocasiona primordialmente e crecemento den CPI. Inflacion excluyendo e componentenan di cuminda y energia a sigui ascende, yegando 2,4 porciento si compara September 2022 cu September 2021. Pa gran parti e componente di compra di vehiculo a causa e inflacion aki, reflehando prijsnan mas halto pa vehiculo. Ademas, siguiendo su tendencia ascendente, inflacion a base di promedio anual a yega 4,7 porciento na September 2022. Prijs mas halto pa gasolin y cuminda tabata e motibo principal pa e subida. Inflacion a base di promedio anual – excluyendo cuminda y energia – tambe a crece te na 2,0 porciento. Sinembargo, e tasa di cambio entre e florin Arubano y e dollar Mericano tabata bahando durante e prome tres kwartaalnan di 2022. E tendencia di bahada ta debi cu e prijs di consumidor na Merca tabata subi mas liher cu na Aruba.

Transaccionnan internacional a traves di banconan comercial a conduci na un entrada netto significante di divisas na balor di Afl. 197,6 miyon den e prome tres kwartaalnan di 2022 (Tabel 2). Consecuentemente, divisas internacional (excluyendo diferencia di revaluacion) a alcansa Afl. 3.087,2 miyon na fin di september 2022. Esaki a resulta for di un entrada di divisas riba e cuenta coriente cu tabata mas fuerte cu e salida di divisas riba e cuenta capital y financiero. E entrada netto di divisa riba e cuenta coriente tabata primordialmente procedente di e cuenta di servicio, particularmente ingreso turistico.

Durante e prome nuebe luna di 2022, data financiero di gobierno a revela cu e deficit financiero a reduci na Afl. 54,9 million, compara cu Afl. 459,3 million den e mesun periodo di 2021. E resultado aki ta debi na un reduccion skerpi den gastonan gubernamental y un ampliacion den entradanan di gobierno. E mehoracion significante den finansas di gobierno tabata relata na e progreso economico empuha door di e recuperacion fuerte di e sector turistico. Ademas, e programanan di asistencia social y di asistencia na negoshinan cu a tuma lugar den 2020 y 2021 tabata ausente den 2022. Tur componente di impuesto, cu excepcion di impuesto riba entrada y ganashi, a mustra un mehoracion compara cu nan respectivo nivelnan di 2019.

Na fin di september 2022, debe di gobierno a aumenta cu Afl. 161,1 miyon, yegando Afl. 5.816,7 miyon compara cu december 2021. E crecemento aki tabata atribui primordialmente na e fiansa cu Gobierno di Aruba a recibi for di Hulanda pa paga debe den exterior y pa necesidad di likides. Na fin di e periodo di analisis, crecemento economico a trece un bahada den e proporcion entre debe y PDB, bahando esaki na 91,2 porcient0, compara cu 101,0 porciento registra na fin di 2021.

E publicacion completo ta disponibel riba BCA su website. (https://www.cbaruba.org/document/state-of-the-economy).

  1. Ingreso turistico ta coresponde na e definicion “tourism credits” manera describi den e manual IMF BPM 6. ↑
  2. Acomodacion total coregi pa hotelnan “high-rise”, “low-rise” y timeshare. ↑
  3. Cu ta e suma cual importacion di bienes y servicio ta surpasa exportacion di bienes y servicio. ↑