Sosten di likides a bin basa riba proyeccion economico negativo; despues a bin e condicionnan

Tanto Corsou, Aruba y St. Maarten, e islanan CAS, como tambe e islanan BES, Boneiro, Saba y St. Eustatius a haci uso desde principio di e pandemia COVID-19, di sosten di likides for di Hulanda. Te cu e prome mey aña di 2021, e paisnan CAS a ricibi cinco tranche di sosten for di Gobierno Hulandes, den forma di prestamo. E islanan BES a ricibi un pakete di emergencia. E Colegio (Aruba) supervision financiero, C(A)ft a conseha Gobierno di Reino riba tur e tranchenan di sosten.

Den su relato presenta recien na Gobierno di Hulanda cu entretanto a bay pa Tweede Kamer, C(A)ft ta bisa cu e paisnan CAS a keda confronta cu e prome contagio di coronavirus na Maart 2020, y mesora e Gobiernonan a tuma pasonan pa limita e peliger di contagio. Asina tambe a cera e fronteranan pa turista y a limita movecion di ciudadanonan. E ‘lockdown’ total a nifica cu turismo y bida publico a para completo. Y sin medionan financiero adicional, e crisis lo a empeora si a bin bancarotanan y Perdida di trabao, sin cu por garantisa continuidad di provisionnan publico cu ta esencial. Dia 27 di Maart 2020, Gobierno di Reino riba peticion di Aruba, pero tambe Corsou y St. Maarten (separadamente) y despues di conseho di C(A)ft a conclui cu e corona crisis ta casonan excepcional manera ta describi den e LAft, esta e ley cu ta e base di C(A)ft. Pa e motibo aki, a permiti pa por desvia di e normanan presupuestario manera ta poni den e ley, y asina a habri caminda pa Hulanda duna sosten na Gobierno di Aruba (y Corsou y St. Maarten). Durante e reunion di Gobierno di Reino di 18 di December 2020 a bay de acuerdo pa permiti Aruba desvia di e normanan pa 2021.

Sosten di likides tabata basa riba calculacionnan economico

E parti mas grandi di e sosten di likides ta(bata) destina pa intercepta e caida den entrada di belasting y primanan, asina leu cu no tabatin reservanan legal disponible na e fondonan. Pero tambe e sosten di Hulanda a yuda cu e subsidio salarial na empresanan y sosten financiero na personanan cu a perde trabao pa motibo di e crisis di corona. A pesar di e sosten di salario, toch sector priva a perde hopi cupo di trabao. Pa tal motibo mes, e conseho di C(A)ft tabata basa riba calculacionnan economico. Sinembargo, no tabatin material historico pa por a haci e calculacionnan, ya cu e crisis aki tabata sin precedencia. Tampoco tabatin informacion riba e desaroyonan economico mas recien cu por a usa. E intensidad y duracion di e crisis como tal tabata sumamente dificil pa proyecta y e calculacionnan economico como tal a keda presenta cu margennan di insiguridad grandi.

Por ehempel Banco Central di Corsou y St. Maarten a calcula un retraccion economico di 4.5 pa 19.4 porciento mensualmente y un deficit presupuestario mensual di 25 pa 35 miyon florin pa Corsou. Pa St. Maarten a tene cuenta cu un crecemento di 0.8 porciento na 2020 y den un caso mas serio, un caida di 29.2 porciento cu un deficit presupuestario cu por a yega na 14 miyon florin pa luna.

Aruba

Pa Aruba, cu ta hopi dependiente di turista, a tene cuenta cu un caida economico di 38 porciento. Aruba mes a haci e calculacionnan aki. E deficit presupuestario calcula tabata di 1.2 biyon a base anual. E calculacionnan economico a sigui continuamente tras di otro, pa asina keda mas cerca di e cambionan den tempo real.

Tambe Fondo Monetario Internacional, IMF, a haci calculacionnan cu a sirbi como base pa e consehonan riba e sosten di likides na Gobierno di Reino. Den su ultimo calculacion pa Aruba, IMF a sali di e punto di salida cu e caida economico na 2020 lo ta 25 porciento y cu pa 2021 lo tin un crecemento di cinco porciento. Pa Corsou y St. Maarten a calcula un caida economico di 20 y 24 porciento respectivamente y IMF ta premira un crecemento di cero porciento pa Corsou y cuater porciento pa St. Maarten na 2021.

Despues di e lockdown

Despues di e lockdown y limitacion di e medidanan riba libertad di movecion, a bolbe habri e fronteranan na Juli/Augustus. Turismo a cuminza, pero e paisnan a keda afecta pa un di dos y di tres ola di contagio. A tuma medidanan mas stringente, sin un lockdown y a cuminza controla mas pa limita e peliger di contagio. Y na Februari 2021 a cuminza a programa di vacunacion pa e islanan den Caribe.

Desde e di dos tranche di e sosten di likides na e paisnan CAS, Gobierno di Reino a dicidi pa mara esaki na condicionnan. E condicionnan aki tin di haber cu introduccion di reformanan economico y adelanto di e preparacionnan pa e reformanan aki, continua cu e recortenan, implementacion di e medidanan di sosten y entrega na tempo di informacion cu ta necesario pa C(A)ft por duna conseho na Gobierno di Reino riba e necesidad di likides di Aruba, entre otro.

Quota di debe di Aruba ta esun mas halto di paisnan CAS

Debe di e paisnan, pa motibo di e prestamonan cu mester yuda cubri e gastonan coriente di presupuesto a subi cuantiosamente. Na fin di e di prome kwartaal di 2021, e quota di debe di Gobierno di Corsou y St. Maarten a yega na 82 porciento y 72 porciento di e Producto Bruto Interno. Pa Aruba, e debe di Gobierno na fin di e prome kwartaal di 2021 a yega na 123 porciento di e Producto Bruto Interno.

E sosten di likides ta caba na fin di April 2022. Y prome cu e periodo aki lo meter determina si y bao cua condicion, lo por financia e prestamonan aki.

Islanan BES

Riba 25 di Februari, Cft a duna conseho tambe riba locual ta anticipa cu islanan BES lo tin como entrada y gasto pa e periodo di Januari te cu Juni 2021, a base di e crisis di corona. Basa riba e conseho aki, e islanan Boneiro, St. Maarten y Saba a ricibi respectivamente dos miyon, un miyon y 300 mil dollar como compensacion pa perdida di entrada. E Ministerio pa Asuntonan Interior y di Reino a paga e sumanan aki den e di dos kwartaal di 2021 como parti di e pakete di sosten y recuperacion.

E grafico aki ta ilustra e desaroyo di turismo pa cada luna, entre December 2019 pa Juni 2021. E ta ilustra cu pa tur e islanan, e caida den turismo na April 2020 compara cu April 2019 tabata 100 porciento. E patronchi di recuperacion tabata instabil, pa tur e islanan. Na Mei 2021, Aruba a logra e recuperacion mas grandi compara cu e otronan, aunke cu el a keda na 20 porciento bao di e nivel di 2019. No a inclui den e grafico aki e bishitantenan di crucero. Tanto pa St. Maarten y Aruba, turista crucero ta importante.