E siman aki Corte Comun di Husticia di Aruba, Corsou, St. Maarten y di Boneiro, St. Eustatius y Saba a presenta e relato anual di 2016. Entre otro por lesa cu e casonan a aumenta cu 4% debi na aumento drastico na Boneiro. Pa Aruba un desaroyo interesante ta cu entrante october tin e opcion di mediation.
E relato di 2016 tin e tema vision, referiendo na e trayecto di vision di Corte cu a culmina e aña ey. Cual a resulta den formulacion di un mision y vision pa 2017 te 2021.
Cantidad di casonan
E cantidad di casonan den Corte na 2016 tabata 37.510. Na 2015 tabatin 36.188 caso. Di e casonan di 2016, a termina 35.697. Pa 2016 tabatin un aumento di caso den corte di 4% compara cu 2015. E aumento aki ta debi primordialmente na e aumento drastico na Boneiro (+37%) y subidanan leve na Corsou (+8%) y St Maarten (+6%).
Registracion di casonan den apelacion ta centralisa na Corsou, cual a subi cu 3% di 788 na 2015 pa 811 na 2016. Di cual 752 di nan a termina, esaki ta representa un bahada leve compara cu 801 na 2015.
Calidad di hurisdiccion
Hurisdiccion ta e tarea principal di Corte. Na 2016 a inverti pa keda garantisa hurisdiccion cualitativamente bon y imparcial. Di evaluacion di Leynan di Reino Hudicial na 2015, a conclui cu Corte ta riba bon caminda. Na 2016 tabatin diferente actividadnan pa garantisa e calidad di hurisdiccion y caminda tabata necesario aumenta esaki.
A subi nivel di profesionalisacion di hurisdiccion fiscal na 2016. Desde dia 30 di april 2016 na tur isla ta posibel pa apela den casonan di Corte fiscal. Tambe a trece cambio den e organisacion di hurisdiccion fiscal, desde 1 di juli 2016 por bay den casacion den e casonan aki. A aumenta frecuencianan di casonan fiscal den Corte y consecuentemente a baha un porcion grandi di retrasonan. Na 2016 tin tanto un Arubano como un Curasoleño studiando pa bira hues na Aruba.
Mediacion banda di Hurisdiccion
Na Corsou desde 1 di januari 2017 ta posibel pa partidonan den un caso den Corte wordo referi pa bay mediacion pafo di Corte y yega na un solucion. Esaki yama “Mediation naast Rechtspraak” (MnR). Den casonan aki, Corte tin un funcion referencial. October awo esaki lo ta posibel na Aruba tambe.
Financia
Corte a cera 2016 cu resultadonan positivo, esaki debi na gastonan mas abou di personal. Cual tambe tabata e caso na 2015. E gastonan aki a resulta mas abou door cu no por a yena tur vacatura y door di gastonan di pensioen mas abou a consecuencia di cambio den e reglamento di pensioen cu Algemeen Pensioenfonds Curaçao (APC) ta ehecuta.
E financiamento di Corte ta basa riba ‘Rijkswet Gemeenschappelijk Hof van Justitie en Rijksbesluit Financiering Gemeenschappelijk Hof van Justitie’. E cuater paisnan den Reino Hulandes, caminda Corte ta trata casonan huridico, conhunto ta financia Corte.
