Recientemente Gemeenschappelijk Hof van Justitie (Corte Comun) di Aruba, Boneiro, Corsow y Sint Maarten, y Sint Eustatius y Saba a presenta e relato anual di 2022. Den e relato e Corte Comun ta elabora ariba e desaroyo di hurisdiccion, desaroyo di operacion comercial, bista riba e sucursalnan, desaroyo di cantidad di caso y finanzas.

Den e edicion di Bon Dia Aruba di 1 di juni 2023, a elabora ariba e fluho di entrada y salida di casonan den Corte Comun y Corte Supremo na unda cu a remarca cu e fluho di casonan ta aumentando un biaha mas, pero ainda no a yega na e nivel di prome cu e pandemia. Tambe a elabora ariba e digitalisacion di e proceso pa casonan di asuntonan fiscal.

Integridad y miembresia Red Global di Integridad Hudicial

Un husticia honesto, independiente y confiable ta posible solamente si tur cu ta traha den e corte conoce nan mes y ta durf di test otro pa e cumplimento di e normanan di integridad. Den e rol di Corte Comun como tercer poder di Estado, tambe ta pas pa mira for di pafo pa paden y examina criticamente y ahusta e propio desempeño.

Pa e rason aki, e hunta directiva a adopta recientemente e politica di integridad y un codigo di conducta relaciona. Despues cu na 2002 Corte Comun a uni na e Red Global di Integridad Hudicial di Nacionnan Uni, a sigui traha riba un codigo di conducta nobo pa e hues- y funcionarionan hudicial.

Minetras tanto, e concepto di esaki a wordo aproba contra e asina yama Principio di Bangalore di Conducta Hudicial. Na final di 2022, e personal di tur rango di e Corte Comun a ricibi un capacitacion ariba e tema aki y asina nan por proporciona nan aporte inicial pa e concepto di codigo di conducta cu ta bay ser adopta den 2023.

Relaciona cu e politica di integridad, Corte Comun ta traha cu Asesor Confidencial externo. Cu e asesor confidencial por haci intercambio anonimo y confidencial di punto di bista ariba cuestionnan di integridad. Esaki ta posible si un persona involucra ta luchando pa su mes cu un problema di integridad of conducta no adecua.

E personal tin e opcion di comunica di forma independiente, sin intervencion di e Tribunal, cu e asesor confidencial. E asesor confidencial tin tres tarea: recepcion y orientacion di reporteronan, proporcionando informacion y contestando pregunta ariba integridad; identificacion di riesgo di integridad y asesora e gerencia ariba e problemanan di integridad den e organisacion. Esaki ta ser realisa den consulta cu e conseho di personal recientemente elegi.

Protocol di desafio

Den 2022 a presenta 17 solicitud di censura na e camara di censura. Den tres caso tabata trata di censura di e sala di desafio. E solicitudnan tabata referi na derecho civil y derecho administrativo. Di e 15 cu a resta, 11 a a ser tramita den e tribunal y 4 solicitud a wordo resolvi afo di e tribunal. Tur e solicitudnan a wordo rechasa. No tin evidencia di parcialidad di parti di e huesnan involucra.

Riba 1 di october 2022 a drenta na vigor un revision di e Protocol di Desafio. E revision aki ta referi, ademas di algun cambio textual, na un lista di caso, hopi biaha procedente di e hurisdiccion aplicable, den cual e solicitudnan di censura  por wordo tramita pafo di un audiencia. Cu e revision aki e Protocol di Desafio ta den acuerdo cu e Protoclnan di Censura aplicable na Hulanda.

Cooperacion y internacionalisacion

E hunta di e Corte Comun ta duna un gran balor na cooperacion cu demas socionan di e cadena hudicial: local, pero tambe den un contexto interregional y internacional. Na 2022, e aliansanan existente cu e Hunta di Estado, e Corte Supremo di Husticia, e Conseho Supremo, Tribunal Central di Apelacion, e Instituto di Capacitacion na RSS y e Ministerio di Husticia y Segruidad y di Interior y Relacionnan di Reino a wordo reforsa.

Den 2022, un delegacion di e Departamento Asesor di e Conseho di Estado a bishita e islanan. Durante e bishita aki a realisa consulta cu e socionan di e cadena local ariba e desafionan den e cadena hudicial.

E colaboracion cu RSV tambe a ser traduci den un investigacion realisa pa e colega di RSV, sr. Maud Klinkers. El a compara e similitud- y diferencianan entre e leynan actual ariba proteccion di data personal y e tan spera Ley di Reino d Consenso.

Tambe a investiga den ki medida e diferente sucursalnan di e Corte Comun den actualidad ta cumpli cu e rekisitonan legal. E resultadonan di e investigacion a ser realisa transparente y a haci recomendacionnan conreto pa e implemenacion di Politica di Privacidad. E politica aki ta ser implementa den e transcurso di aña 2023.

Den 2022, Corte Comun a ser admiti como miembro number 103 di e Red Superior di Tribunal (SCN). SCN ta un red di tribunal adhunto na e Tribunal Europeo di Derechonan Humano. E obhetivo di SCN ta garantisa un intercambio efectivo di informacion entre e tribunalnan nacional mas halto y e Tribunal Europeo di Derechonan Humano.

Corte Comun ta desea di sigui yama atencion ariba e situacion actual di tratadonan di proteccion infantil y e importancia di e mesun ta aplicable na tur e pais y isla. Den esaki e Corte Comun no ta su so. Tin un organisacion intergubernamental, Haagse Conferentie voor Internationaal Privaatrecht, HCCH (Conferencia di Den Haag pa Cooperacion Internacional di Derecho Priva), cu tin como obhetivo unifica e derecho internacional priva, incluyedno derecho pa proteha mucha.

Bao e señalnan di HCCH ta existi un red internacional di huesnan di enlace (Red Internacional di Huesnan di Den Haag). E huesnan di enlace por consulta/informa un na otro ora cu ta trata di casonan internacional relaciona cu mucha. Den e caso aki por pensa riba casonan manera robo/secuestro di mucha y asuntonan di adopcion.

Pa comparti experiencia, intercambia pensamento y mantene contact, tin conferencianan ta wordo organisa pa y door di e huesnan di enlace, na un ubicacion pero tambe online.

E di 7 conferencia di Cajo, cu ta tuma luga cada dos aña, cu e tema “Podernan hudicial di Caribe den un mundo cambiante” a tuma luga di 27 pa 29 di october di 2022 organisa pa e Tribunal Supremo di Caribe Oriental na Santa Lucia. E conferencia a atrae mas di 120 funcionario hudicial di full e region incluyendo un delegacion di seis persona di Corte Comun.

Durante e reunion di miembro, Corte Comun, den nomber di e seis islanan di Caribe,  a ser admiti como miembro di e derecho di Cajo. Te e tempo ey, Corte Comun tabata un miembro asocia.

Deseonan di e legislador

Corte Comun a puntra e minsiternan di husticia y  representantenan di diferente pais cu e legislacion mester wordo rectifica, completa of actualisa. Pa cada pais a realisa un resumen di leynan cu ta aplica den e tereno di derecho penal, derecho adminsitrativo, derecho civil y derecho tributario cu mester wordo revisa door di e legislador y  unda cu ta posible, haci propuesta na Corte Comun pa mehoracion  y modernisacion di e legislacion.