Recientemente Algemene Ziektekostenverzekering (AZV) a presenta su relato anual di aña 2024. Director di AZV, Edwin Jacobs a presenta e relato anual den cual AZV ta detaya con aña 2024 a bay pa e organisacion den diferente aspecto y ta duna un revision amplio di e rindimento di 2024 y ta ofrece proyeccionnan a traves di e Financieel Meerjaren Kader (cuadro financiero multianual).
Den e relato anual 2024 tin varios punto cu a resalta. Pa loke ta trata accion y logronan strategico den 2024, AZV a marca progreso significante den varios area strategico.
E organisacion a integra un cuadro financiero multianual pa garantisa miho planificacion fiscal y sostenibilidad; a avansa den implementacion di e Zorgakkoord, un politica di cuido di salud coordina; a realisa esfuersonan continuo pa reduci listanan di espera; a entrega un resultado financiero positivo a pesar di presionnan economico; y a envolve den Schatkistbankieren (banco di tesoro), indicando maneho financiero prudente.
E logronan aki ta pone un fundeshi solido pa tanto excelencia operacional como responsabilidad fiscal a largo plaso.
Pa loke ta trata tendencianan di poblacion asegurado, e organisacion a mira un crecemento stabiel den e cantidad di asegurado bou di AZV. Na 2024, tabatin 108.378 asegurado, un aumento chikito for di 107.878 cu tabatin den 2023.
E cambio anual promedio for di 2018 ta refleha fluctuacionnan leve, mayoria di nan dentro di alrededor di 1% resaltando un base di seguro stabiel a pesar di cambionan demografico.
E stabilidad aki ta crucial den pronostica y maneha gastonan di cuido di salud y planificacion di capacidad.
Mirando e costo promedio pa asegurado, AZV ta indica cu esaki ta subiendo, pero di un forma controla. Entre 2018 y 2024, e costo promedio pa asegurado a subi di 3.956 florin pa 4.502 florin. E aumento na 2024 (2.9%) ta cuadra cu inflacion y tendencianan di gasto medico.
Aunke e aumento ta gradual, e importancia di maneha gastonan di unidad ta keda primordial pa preveni tension fiscal den futuro. Esfuersonan den eficiencia, cuido preventivo y digitalisacion por yuda mas aleu den mantencion di efectividad di costo.
Pa loke ta trata aseguradonan adultonan mayor, 65+, e crecemento den e grupo demografico aki ta un di e tendencianan mas impactante. E parti di aseguradonan di edad 65+ a alcansa 18.4% na 2024, compara cu 11.8% den 2014, y 18.4% den 2024.
E aumento di 6.6% aki durante un decada ta indica un aumento di presion riba servicio di cuido di salud, particularmente pa malesanan cronico y cuido a largo plaso.
Pa atende e cambio aki, AZV ta remarca cu ta rekeri inversionnan den cuido geriatrico, servicio di salud na cas, y maneho di malesa cronico.
Indicadornan operacional di e servicionan interno di AZV ta mustra consistencia. Pa loke ta trata declaracionnan di dunadornan di cuido, esaki a mira un baha hopi chikito, for di 6.263 den 2023 pa 6.244 den 2024. Di otro banda declaracionnan di asegurado a baha te na 592 na 2024 for di 687 den 2023. Y e autorisacionnan otorga a aumenta un poco te na 33.744, compara cu 33.466 den 2023.
Esaki, e organisacion ta subraya, ta refleha un sistema cu ta stabilisando y potencialmente ta beneficia di optimalisacionnan digital y di procedemento.
Resultadonan Financiero 2024: Surplus den un Aña di Reto
E rendimento financiero di AZV na 2024 tabata robusto:
Den 2024, e entrada total a yega na 607.8 miyon, compara cu 545.9 miyon den 2023 y un presupuesto di 550.3 miyon pa 2024. E costonan di cuido di salud (zorgkosten) a yega 487.9 miyon den 2024, un aumento leve compara cu 474.2 miyon di 2023, pero ainda bou di e presupuesto planea di 503.2 miyon. E costonan operacional (Beheerskosten) tambe a subi modestamente pa 18.2 miyon, contra 17.1 miyon den 2023, y un presupuesto di 20.4.
E resultado final ta un surplus di 101.7 miyon, un logro significante, indicando entradanan mas halto y gastonan eficientemente controla. Compara cu un surplus presupuesta di solamente 26.7M, e cifra actual ta refleha un ehecucion financiero excepcionalmente fuerte.
E relato anual a identifica sectornan cu gastonan cu a conoce aumento como tambe reduccion. E top tres sectornan c a mira un reduccion di gasto ta cuido dental, cu un bahada di 6.37%, cuido medico specialisa cu un reduccion di 3.08%, y cuido obstetrico cu un bahada di 1.64%.
Pa loke ta e top tres sectornan cu a mira un aumento, eseynan ta cuido di dokter di cas cu a mira un aumento di 12.36%, cuido den exterior cu a mira un aumento di 11.3%, y transporte domestico pa cuido cu a wak un aumento di 7%.
E cambionan aki por refleha strategianan di cuido cu ta den desaroyo, cu mas enfasis riba cuido primario y tratamento internacional.
Pa loke ta trata gastonan administrativo, AZV ta indica cu aunke no ta detaya den cifranan, ta subraya e intencion di AZV pa mantene operacionnan interno eficiente mientras ta sostene normanan di servicio halto. Transformacion digital continuo y proceduranan eficiente ta probablemente contribuyentenan clave pa tene e gastonan aki bou di control.
E salud fiscal di AZV no por ser mira den apart y su integracion cu e cuadro financiero mas amplio di Aruba ta clave.
E plafond di gasto pa AZV pa 2024 a ser fiha na 520.8 miyon. E gasto real di AZV a yega na 506.1 miyon, locual ta nifica cu e organisacion a keda bou di e plafond estableci. Danki na esaki, AZV a logra mantene disciplina financiero mientras a crea espacio financiero adicional.
E espacio financiero carga a crece di 2.4 miyon den 2023 pa 14.7 miyon den 2024, refleha un mehoracion significativo den e posicion financiero di AZV. Esaki ta demostra no solamente gastonan prudente pero tambe e capacidad pa genera y conserva flexibilidad financiero.
Den e relato anual, tambe ta inclui un bista di implicacion y proyeccionnan fiscal mas amplio. For di un punto di bista macroeconomico, AZV ta contribui na planificacion financiero nacional. Pa 2024, e presion di belasting ta calcula na 41–42%. E proyeccionnan di debe publico ta indica un nivel di 72% di GDP pa 2025, cu e meta di reduci esaki pa 55% di GDP pa 2031.
E proyeccionnan ta anticipa un surplus den e fondonan di gobierno y di seguro social (AZV inclui) di 2025–2029. Esaki ta cuadra cu e metanan mas amplio di reduci debe publico y mehora resiliencia fiscal.
E relato anual di 2024 di AZV ta un testimonio di e organisacion su vision strategico, maneho financiero sano, y compromiso incansabel cu salubridad publico. Cu un surplus positivo, gastonan controla, y disponibilidad pa sostene un poblacion cu ta embehece, AZV ta reenforsa su rol como un pilar vital den e ecosistema di cuido di salud di Aruba.
Sinembargo, e organisacion ta remarca, pa mantene e trayectoria aki ta rekeri vigilancia continuo. Cambionan demografico, aumento di gastonan medico, y shocknan externo lo sigui desafia sistemanan di salud globalmente, y Aruba no ta un excepcion. Pero cu gobernacion fuerte, planificacion multianual, y implementacion di politica responsivo, AZV ta bon posiciona pa cumpli cu e retonan aki y sigui entrega cuido di calidad na tur ciudadano asegura.
