Diabierna ultimo 29 di october, atrobe Aruba a conoce un otro sentencia, e biaha aki e fotografo y ex-coordinador di Ministerio di Husticia anterior, esta Jason Margarita a wordo sentencia na 30 luna di prison. Hues di Corte di Prome Instancia a indica cu Margarita ta culpabel di tene relacion sexual y comete acto inmoral cu un menor di edad.

E caso aki a cuminsa haya forma na luna di februari di 2021, na unda cu e mama di e victima a entrega un keho penal dia 5 di februari, den cual el a declara cu e tabata hopi sigur cu Margarita tabata mishi cu su yiu menor di edad.

Un dia prome, e mama a tuma e iniciativa di coba den e mucha su telefon, caminda el a descubri cu Margarita y su yiu tabata sunchi cu otro desde september di 2020.

Dia 8 di februari, e ruman di e victima tambe a duna su declaracion como testigo. El a bisa cu algo no tabata bon, Margarita semper tabata insisti pa nan dos, e hunto cu su ruman bay Margarita su cas.

Hopi testigo a bisa cu nan tabata wak Margarita y su ruman cu tabata actua di manera sospechoso ora nan tabata den gym.

Dia 16 di februari, Jeugd en Zeden Politie a haya e mensahenan entre Margarita y e victima. Por ehemplo, mensahenan di 5 di november di 2020, den cual Margarita tabata skirbi na e victima: “Goya su porta ta cera? Of habri, bo por bin ariba sin cu Goya wak bo? Keto keto.”

“Julie ta bin den 30 minuut, bin ariba slow” – riba e mensahe aki a confirma a base di declaracion, cu (e cas di Margarita ta di dos piso) e dia specifico aki e victima tabata na Margarita su cas unda cu e tabata studiando den e oficina.

E mesun dia aki Margarita a invita e victima pa bay den camber na parti ariba, unda cu normalmente Margarita cu su casa ta drumi. Na prome instante nan a keda papia y despues Margarita a sunchi e victima.

Margarita tambe tabata haci acto inmoral cu su victima den e gym propiedad di dje y su casa, na unda cu e victima tabata traha siendo menor di edad, segun un declaracion. Margarita tabata comete acto sexual den e camber di masashi cu e victima.

Dia 8 di october di 2021 Margarita a declara cu e tabatin un relacion cu e mucha menor di edad: “mi a desaroya sentimentonan romantico pa e mucha, mi ta stim’e.”

Den Corte di Prome Instancia a keda proba cu Jason Margarita di 40 aña di edad a wordo haya culpabel di a viola e dos articulo aki:

Articulo 2:200 di Codigo Penal di Aruba ta indica cu “Esun cu haci cu un hende cu tin 12 aña di edad y no a cumpli 16 aña di edad ainda, door di comete actonan inmoral cu ta consisti di penetracion sexual ta wordo castiga cu maximo di 12 aña di prison of un multa di categoria 5.”

Articulo 2:208 di Codigo Penal di Aruba ta bisa cu “Esun cu comete actonan inmoral cu su yiu menor di edad, su yiu di criansa, su yiu adoptivo, su alumno, un menor di edad cu ta cay bou su cuido, bou su guia of un empleado menor di edad, of un menor cu ta depende di un adulto ta wordo castiga cu maximo di 8 aña di prison of un multa di categoria 5.”

Riba rednan social por a mira diferente comentario y reaccion di personanan cu tabata cuestiona e victima. Mescos cu den pasado tambe a sucede cu Ostrick Jansen, miho conoci como “Mc Oz”. Jansen tambe a wordo condena cu 18 luna di prison pa motibo cu el a viola articulo 2:200 di Codigo Penal di Aruba. Den e caso aki Jansen tabatin 31 aña y e victima tabatin 14 aña.

Den e sentencia di Jansen tambe a keda conoci cu den su acto sexual cu e victima e no a usa condom. Hues a baha pisa riba dje pa e hecho cu segun hues, el a expone e victima na un embaraso no desea, unda cu a practica un aborto ilegal cu halto riesgo poniendo e bida di e victima na peliger.

Diabierna ultimo 29 di october ora e sentencia di Margarita a keda conoci. Su abogado Zuhaila Arends-Marchena a menciona pa 24ora cu “ley ta ley. Abo ta mayor di edad y si e ta un teenager yegando naturalmente e edad caminda cu e no ta bira un klachtdelict y esey ta ley, cu bo ta wordo castiga pasobra esey ta e ley, no matter si bo a cuminsa e relacion of no. Mi ta kere esaki ta un bon indicacion pa tur hende eyfo tambe pa wak bon kico bo ta haci, pasobra na final di e cuenta abo ta esun cu ta e mayor di edad y abo ta esun cu ta responsabel. Aunke bo no tabatin ningun indicacion di pedofilia y no tabatin ningun mal intencion, pero e ta keda castigabel pa ley. Abo mester sa esey, bo ta mayor di edad.”

Tambe, Arends-Marchena a señala cu esaki ta un indicacion pa pueblo general mester ta mas consciente di nos leynan y con nan ta hinca den otro.