Tin un futuro insigur pa e estudio di enfermeria di EPI, segun e documentonan di transicion cu ex Minister di Enseñansa Armando Rudy Lampe a laga atras pa su sucesor. Motibo di esaki ta cu Hospital dr. Horacio Oduber, HOH, a hala atras pa brinda espacio pa studiantenan di enfermeria di EPI.

Motibo, segun e documento ta cu Enseñansa Profesional Intermedio no ta cambia su programa educativo y esaki como tal no ta cumpli mas cu e calidad di exigencia di HOH.

Sinembargo, for di otro fuente Bon Dia Aruba a compronde cu EPI a sinta cu HOH pa papia di un trayecto di renobacion di programa, algo cu a inicia caba. E intencion ta pa na 2022 cuminza cu e programa di enfermeria nobo, pa cumpli cu exigencianan general di enfermeria y tambe locual HOH ta exigi.

Sinembargo, prome cu aña escolar 2021-2022 a cuminsa a drenta un carta di HOH cu ta pone un banda e palabracionnan cu a haci den e combersacion y berdad ta bisa cu EPI no kier cambia. Y mesora su tras a drenta un carta di e ex Minister Lampe pa EPI unda a reitera e postura di HOH. E carta aki a cay manera un bom, mirando cu e ex Minister sa cu un institucion manera EPI no tin e fondonan necesario pa cambia henter su curiculo den un solo tiro.

Locual Bon Dia Aruba a compronde cu HOH mientrastanto ta considerando pa traha cu un instituto MBO di Boneiro, cu tambe ta duna estudio di enfermeria y tambe cu otro instituto educativo na Hulanda. Pa e instituto di Aruba, esaki ta sinti manera un rechaso pa locual Aruba mes por ofrece, si berdad Gobierno tabata inverti locual mester den EPI. Aunke cu ta subsidia tur salario di e 200 docentenan, locual no tin ta placa pa desaroya programa nobo, trece innovacion. No tin ni suficiente material pa duna e lesnan.

“Tin solamente 500 florin pa luna pa duna studiantenan les di cushinamento,” un docente a bisa Bon Dia Aruba. “Si no tabata pa e Chef cu a haya sosten di companianan por mayor na Aruba, lo no por a sigui cu e lesnan di cushinamento,” e docente a sigui conta. E ehempel ey ta djis uno di e realidad di EPI cu ta haya unicamente como 20 porciento di e fondonan cu mester pa por brinda un enseñansa na nivel.

Bon Dia Aruba a tuma contacto cu Director di EPI, Sr. Ryan Maduro kende a bisa cu e ta reconoce algun di e ponencianan, pero e mester sa exactamente kico ta den e relato di transicion prome cu e por duna comentario.