Rednan social, wega y otro servicionan online no lo ta permiti pa ‘pusha’ muchanan Britanico pa revela detayenan personal of reduci nan setting di siguridad, bou di reglanan fuerte presenta pa e regulado di privacidad di e pais.
E set di standard cu meta pa protege privacidad di mucha online a ser revela ayera pa Oficina di Comisionado di Informacion, pa parlamento aproba.
“Tin ley pa protege muchanan den mundo real – rating di pelicula, asiento di auto, restriccion di edad pa bebe y huma. Nos mester nos leynan pa protege muchanan den mundo digital tambe”, segun Comisionado di Informacion, Elizabeth Denham a bisa. “Un generacion despues, nos lo mira bek y haya asombroso cu servicionan online no semper tabata diseña cu muchanan den mente.”
Companianan tecnologico no lo por uza ‘nudge techniques’, manera haci un opcion parce mas facil cu e alternativa, pa curasha muchanan pa provee datonan personal innecesario of debilita of paga nan proteccion di privacidad. Tambe lo mester verifica edad di e usuario of aplica e standard di e codigo na tur usuario.
Comparti of transmiti ubicacion di un mucha mester ta paga pa default, igual cu traha perfil di mucha pa asina-yama aviso basa riba comportamento, segun e reglanan nobo. Otro rekisito ta inclui colecta y tene un ‘cantidad minimo’ di datonan personal y haci setting di ‘privacidad halto’ e default. Servicionan online mester tene e miho interes di mucha den consideracion y no mester uza nan data pa recomenda automaticamente contenido dañino, manera video promoviendo suicidio of anorexia.
E ‘age appropriate design code’ tin 15 standard cu den total mester cumpli pa app, co’i hunga conecta, plataforma di red social, weganan online, website educativo y servicio di streaming. Nan ta aplica na cualkier servicio online cu probablemente un mucha lo uza y na tur compania ofreciendo nan servicio na Reino Uni.
Esun cu viola e regla ta enfrenta castigo incluyendo, den casonan serio, multa na balor di 4% di e ingreso global di un compania, cual pa e gigantenan di Sillicon Valley manera Facebook por nifica biyonnan di dollar.
Unabes Parlamento duna su aprobacion, companianan lo ricibi un periodo di transicion di 12 luna pa adapta na e reglanan nobo. Ta spera cu lo drenta den efecto completo pa herfst 2021.
