Vigilante di competencia Britanico a bisa ayera cu a lansa un investigacion riba e plan di Google pa renoba su sistema di data di aviso, pa motibo di preocupacion cu esaki por laga menos espacio ainda pa rivalnan den industria di aviso online.

E Autoridad di Competencia y Mercado (CMA) a bisa cu a habri un investigacion formal riba e propuestanan di Google pa elimina e asina-yama cookies di tercero for di su browser popular Chrome y motor di browser Chromium.

Cookies ta pidanan chikito di texto cu ta keda den aparatonan pa keda al tanto di informacion di usuario, manera nomber di log-in. Nan ta usa pa yuda negoshinan enfoca avisonan mas efectivamente y paga pa contenido gratis online manera corant, pero tambe por usa nan pa track usuarionan riba internet.

Google a propone reemplasa cookies terceros cu su propio hermentnan, como parti di un ‘privacy sandbox’ programa pa lansamento na 2022. Pero e vigilante a bisa cu e cambionan por afecta negativamente e habilidad di editornan pa gana placa, como tambe por socava competencia pa aviso digital, estableciendo mercado di poder di Google.

“Propuestanan di Privacy Sandbox di Google potencialmente lo tin un impacto hopi significante riba editornan manera corant y mercado di aviso digital. Pero tambe tin preocupacion pa considera tocante privacidad”, hefe ehecutivo di (CMA)m Andrea Coscelli a bisa den un declaracion. Reguladonan lo traha cu comisionado di privacidad di Reino Uni y ta den contacto cu Google durante e investigacion, el a bisa.

Chrome ta e broswer dominante di mundo, y hopi otro manera Edge di Microsoft ta basa riba tecnologia Chromium di Google. Den un estudio di mercado aña pasa, CMA a haya cu Google ta controla mas di 90% di e mercado di aviso di buskeda na Reino Uni, balora na 7.3 biyon libra ($10 biyon).

Google a destaca cu no a haci ningun cambio ainda y ta colaborando cu e industria pa bin cu e miho solucion. E compania a nota cu otro browsernan manera Safari y Firefox ya a cuminsa blokea cookies di terceros, pero tambe a reconoce cu movidanan asina ta afecta e habilidad di creadornan di contenido, salanan di redaccion, desaroyadonan di web y videografonan pa gana placa.

“Crea un red mas priva, mientras tambe ta permiti editornan y anunciantenan cu ta sostene un internet liber y habri, ta rekeri pa e industria haci cambionan mayor na e forma con aviso digital ta traha”, e compania a bisa.

CMA a habri su investigacion despues di ricibi un keho di un grupo di industria, Marketers for an Open Web, cu a bisa cu e cambionan lo crea un ‘hardin cera’ propiedad di Google y ta nenga e editornan acceso na cookies cu nan ta usa pa bende aviso digital, afectando nan revenue pa hasta dos tercio.

“Proveyendo informacion personal, identificable mas directamente na Google no ta protege privacidad di niun hende”, e grupo a bisa, cual ta integra pa companianan di tecnologia y editornan. “Nos ta kere cu investigacion di CMA lo confirma esaki y salba internet pa futuro generacionnan.”