(AP)—E oficina di prome minister Britanico Keir Starmer a bisa diabierna cu Reino Uni no lo interveni den e peticion di e Corte Criminal Internacional (ICC) pa un orden di detencion contra e prome minister Israeli Benjamin Netanyahu.
E anuncio ta un anulacion di plannan anuncia pa ex-prome minister Rishi Sunak, ken a perde e eleccion e luna aki ora e partido di Labor di Starmer a gana. “Esaki tabata un propuesta pa e gobierno anterior cual no a ser entrega prome cu eleccion, y cual mi por confirma gobierno no lo persigui mirando nos posicion cu esaki ta un asunto pa e corte mes dicidi,” segun un vocero di Starmer.
E fiscal di e corte halto, Karim Khan, a acusa Netanyahu, minister di Defensa Israeli Yoav Gallant y tres lider di Hamas– Yehya Sinwar, Mohammed Deif y Ismail Haniyeh—di crimennan di guera y crimennan contra humanidad na Gaza y Israel.
Netanyahu y otro lidernan Israeli a condena e decision como antisemitico. Presidente Mericano Joe Biden tambe a critica e fiscal y a apoya e derecho di Israel pa defende su mes contra Hamas—como tambe Sunak.
Khan a busca ordennan pa Netanyahu y Gallant na mei tocante e guera di Israel na Gaza den un golpi simbolico pa isola Israel mas pa via di e guera na Gaza. Israel no ta un miembro di e corte. Hasta si suministra e ordennan, Netanyahu y Gallant no lo enfrenta e riesgo di persecucion. Pero e menasa di aresto por haci’e mas dificil pa nan biaha.
ICC a pone un deadline pa ayera pa gobierno entrega un desafio.
E decision di Starmer ta pone Reino Uni den conflicto cu Merca, aunke su oficina a describi ayera cu e decision tabata basa riba un creencia fuerte den e separacion di poder y e regla di ley domestico y internacional.
Sinembargo, e problema ta un dificil pa Starmer y su partido. Starmer, ken tabata un abogado pa derecho humano, ta bao presion di su partido pa tuma un posicion mas estricto riba e crisis andante na Gaza, particularmente como cu e cantidad di morto y herido ta subi.
Londres a perde apoyo y asiento cu nan a spera di gana despues cu Starmer a nenga inicialmente pa haci un yamado di alto el fuego net despues cu Israel a tuma represalia pa e atake di dia 7 di october pa militantenan di Hamas. E partido ainda ta recuperando for di e mancha di un scandal envolviendo acusacionnan antisemitico contra e liderazgo di su predecesor, Jeremy Corbyn.
Nomi Bar-Yaacov, un associate fellow na e think tank London’s Chatham House, a bisa cu e posicion di Starmer riba Israel ta cambiando for di esun di su aliado cercano, Merca, mientras e scala di morto y destruccion na Gaza ta continua.
Starmer a restaura fondo pa e agencia di alivio pa Palestina UNRWA, cual a ser suspendi pa e gobierno di Sunak na januari. Tambe el a bisa cu e estado Palestino tin un “derecho” pa ser reconoci como parti di un proceso pa paz.
