Reino Uni tin plan pa crea un vigilante nobo pa controla companianan tecnologico grandi incluyendo Google y Facebook pa contraresta nan dominio di mercado y preveni nan di explota clientenan y negoshinan chikito.
Gobierno Britanico a bisa diabierna cu ta instalando un ‘Unidad di Mercado Digital’ proximo aña pa enforsa un codigo di conducta nobo gobernando e comportamento di gigantenan tecnologico cu ta domina e mercado di aviso online.
E Unidad di Mercado Digital, cu lansamento programa pa proximo april, lo supervisa un regimen regulador nobo pa companianan tecnologico cu meta pa fomenta mayor competencia.
E medida tabata pronostica den hallazgonan di ex-consehero economico di Obama, Jason Furman, kende tabata comisiona pa Tesoro di Reino Uni pa ehecuta un revision di e economia digital.
Ta parti di un empuhe mas amplio di gobiernonan Mericano y di Europa pa controla e poder di companianan tecnologico grandi entre preocupacion tocante nan influencia exagera. Union Europeo e siman aki a revela propuestanan pa kita control di data di companianan tecnologico y ta programa pa revela detayenan proximo luna di un adaptacion amplio di regulacion digital cu meta pa preveni ‘gatekeeper’nan di reprimi competencia. Na Merca, autoridadnan ta siguiendo un caso anti-competencia contra Google y legisladornan a propone pa separa companianan tecnologico grandi.
Secretario Digital Britanico, Oliver Dowden a bisa cu plataformanan online por trece beneficio na sociedad, ‘pero tin consenso aumentando na Reino Uni y den exterior cu e concentracion di poder entre un cantidad chikito di companianan tecnologico ta dañando crecemento di e sector, reduciendo innovacion y tin impacto negativo riba e hende y negoshinan cu ta depende riba nan’.
Gobierno ainda mester consulta riba con e Unidad di Mercado Digital lo opera y aproba legislacion pa esaki.
Bao e codigo nobo, companianan lo mester ta mas transparente riba con nan ta usa data di consumidor. Nan lo mester permiti usuarionan scoge si kier ricibi aviso personalisa, y no lo ta permiti pa hacie dificil pa usuarionan usa plataformanan rival.
E Unidad di Mercado Digital por ricibi e poder pa suspende, blokea of reverti cualkier decision haci pa companianan tecnologico grandi, y duna orden pa nan haci cierto accion pa cumpli cu e codigo. Si companianan no cumpli, e vigilante por duna nan un boet, maske e maximo ainda no a keda detaya.
Google a bisa cu competencia den aviso den industria tecnologico ta aumentando, y a nota cu ta duna usuarionan hermentnan pa maneha y controla nan data. “Nos ta sostene un maneho cu ta beneficia hende, negoshi y sociedad, y nos ta anticipa pa traha constructivamente cu e Unidad di Mercado Digital pa asina tur hende por saca e miho probecho di internet”, segun Ronan Harris, vicepresidente di e compania pa Reino Uni y Irlanda, a bisa.
Facebook a nenga di duna comentario.
