Gobierno di Aruba ta informa cu Reino a aproba e nombramento di Carlos Jose Mata Figueroa como consul general nobo di Venezuela na Aruba.
E procedura a cana su curso normal y recientemente a finalisa y dia 1 di mei Venezuela a wordo informa cu Reino ta bay di acuerdo cu su admision, asina e relato di gobierno ta bisa.
“Riba pregunta di prensa cu si e nombramento aki tabata parti di e negocacion entre minister Stef Blok di Hulanda y autoridadnan Venezolano dia 7 april ultimo na Caracas, minister presidente Evelyn Wever-Croes a indica cu manera cu el a wordo informa, minister Blok no a haci ningun compromiso na Venezuela. E tema a wordo treci dilanti si di parti di Venezuela.”
E preguntanan di prensa a bin como cu e candidato ta un persona controversial aparentemente. Merca ta sospecha sr. Mata Figueroa di ta envolvi den contrabanda di droga internacional. Y tambe e ta forma parti di e grupo di personanan rond di presidente Nicolas Maduro cu Merca a sanciona personalmente.
Sinembargo awor gobierno di Aruba ta informa cu: “E proceso di screening pa cu acreditacion di e consul tambe a wordo aplica y e screening no a duna indicacion di hechonan cu por a stroba e acreditacion, Prome minister a indica riba preguntanan tocante posibel antecedentenan criminal di e persona en cuestion.”
“Pues den e caso aki no lo tin ripiticion di e caso di Carvajal pasobra e procedura corecto a wordo sigui pa tanto Venezuela como Reino den caso di nombracion y admision di sr. Mata Figueroa como consul general di Venezuela na Aruba”, asina e gobierno ta afirma den su relato.
