Durante un bishita na Aruba, minister di Relacion Exterior di Reino Hulandes ta admiti cu Reino ta preocupa cu e desaroyo na Venezuela. Introduccion di un visa pa Venezolanonan drenta, por ta un di e opcionnan, e ta bisa tambe.
Sinembargo e mandatarionan, cual tambe e prome ministernan di Corsou y St. Maarten, no a discuti e introduccion di un visa. E reunion cu nan, nos prome minister y e minister Koenders ta uno cu tur aña ta tuma luga. E tema di Venezuela ta un di nan cu a wordo discuti. Minister Koenders: “Hopi cos a cambia den e ultimo añanan aki manera Merca awo tin un presidente nobo como tambe e relacionnan entre Merca y Cuba. E posibilidadnan tambe pa tin un sosten cu henter un continente di Latino America. Pero tambe tin algun puntonan fastioso manera e situacion na Venezuela. E minister a menciona den corto cu China tambe ta hungando un rol pa locual ta cambionan den e region, pero no a ofrece mas detaye.
Retonan ta varia
E mandatario ta bisa pa cu Venezuela cu nan a cuminsa analisa diferente scenario di kico por pasa si cos cuminsa bay mas atras na Venezuela. Ta analisando pues con nan por prepara pa atende cu asuntonan di migracion, insiguridad y tambe pa percura pa ta mas alerta cu un miho mecanismo di control. “Mi ta kere e mensahe di e encuentro aki ta cu no tin necesidad pa naividad. Nos ta prepara pa diferente posibilidadnan cu por desaroya nan mes den un diferente manera na cada isla. Nos ta comunica riba esaki sin mester ta pesimista y djis ta alerta riba e situacion.” E mandatario a sigui bisa cu Reino tin un bon relacion cu Venezuela. Pero e ta compronde cu habitantenan di nos islanan tambe ta hopi preocupa cu e situacion di e pais.
Pagonan aerolineanan
Segun nos partner den noticia, Ret Karibense, e minister Hulandes tambe a indica cu nan ta lobby por medio di e embahada na Caracas, riba e pagonan cu Venezuela ainda ta debe e aerolineanan. Esaki siguramente ta conta pa InselAir y Aruba Airlines.
Caricom
Finalmente minster Koenders ta menciona cu e tambe a discuti cu e prome ministernan riba miembrecia di e islanan Caribense Hulandes di e union comercial Caricom. Esaki lo por tin su efectonan negativo pa entre otro Aruba haci negoshi cu e otro miembronan Caribense.
