(AP) — Reina Hulandes, Maxima a join un robot chikito diahuebs ultimo pa revela un brug di hero pa peaton, construi usando tecnologia di 3D-printing, riba un canal den curason di Red Light District na Amsterdam.
Maxima a primi un boton cu a pone e brasa di e robot den mocion pa corta un cinta door di e canal cu un par di sker.
E lineanan distintivo cu ta core riba e brug di 12 meter a ser crea usando un tecnica di 3D printing yama ‘wire and arc additive manufacturing’, cu ta combina robotica cu welder.
Tim Geurtjens, di e compania MX3D, a bisa cu e brug ta destaca e posibilidadnan di e tecnologia. “Si bo kier tin un brug berdaderamente altamente decora, of un brug realmente estetico, diripiente ta bira un bon opcion pa print esaki”, el a bisa. “Pasobra no ta bay djis pa haci cosnan mas barata y mas eficiente pa nos, ta bay pa duna arkitecto- y diseñadornan un herment nobo – un herment hopi cool – den cual nan por pensa di nobo e diseño di nan arkitectura y nan diseñonan.”
E structura di seis ton lo ser ekipa cu sensornan cu investigadornan na Imperial College London lo usa pa monitor e brug en bibo y midi con e ta reacciona na e uso di e peatonnan. E brug lo keda instala pa dos aña, mientras e brug cu anteriormente tabata riba e canal aki ta haya renobacion.
Micha Mos, un concejal di municipalidad Amsterdam, a bisa cu e brug por yuda trece turistanan nobo na e ciudad, mientras e ciudad ta purba di limpia un bario conoci pa clubnan dudoso y fiestanan cu zonido fuerte. “Esaki por atrae un tipo nobo di bishitante, un cu ta mas interesa den arkitectura y diseño, loke lo yuda cambia e forma con ta percibi e bario mas como algo cu bo kier bishita, pero ta bishita mas respetuosamente cu den ultimo decadanan”, el a bisa.
