Ariba e ultimo dia di e bishita real, su mahestad Reina Maxima tabata di bishita na Cunucu Koolman, un proyecto cu a nace danki na financiamento di Qredtis Aruba, cu ta un fundacion na cual e reina ta liga na Hulanda tambe.

Alexandra Pestana, doño di e chicken farm di Pestana Ranch, a conta Bon Dia Aruba cu su proyecto a cuminsa na momento cu el a solicita un credito cu Qredits, pasobra e pandemia a cuminsa. Mescos cu hopi hende rond mundo, el a afecta Pestana tambe y p’esey a tuma e decision di purba cu Qredits.

“Nan a brinda nos confiansa pa cuminsa pasobra nos tabata un tiki atras. Nos a cuminsa eynan y tur cos a cuminsa mehora poco poco. Nos a cumpli tambe cu Qredits y nos ta contento mutuamente, nan cu mi y ami cu nan,” Pestana a indica.

Pa loke ta su encuentro su mahestad, Pestana a expresa: “E reina tabata hopi bunita, hopi agradabel. Mi tabata un poco nervioso, pero e ta hopi bunita den cuestion di papia cu hende, hopi preciso tambe y di berdad hopi emocionante.”

Darrel Koolman ta encarga cu e Cunucu Koolman y el a conta cu e idea pa cuminsa cu su cunucu a bin door cu su tata a cuminsa splik’e con pa planta. Di eynan poco poco e mes a bira interesa den plantamento y el a tuma cursonan pa yega na unda e ta aworaki.

Pa loke ta trata futuro, Koolman a splica cu aworaki e ta participando den e proyecto di Agro Business Academy di Qredits pa asina e por traha un business plan y despues traha un green house riba e tereno aki pa engrandece su negoshi.

Koolman a remarca cu e experiencia aki tabata uno unico pa su persona y cu e ta hopi contento cu e por a combersa un rato cu su mahestad tocante su pasion. “E tabata un experiencia unico. E tabata echt un honor y mi ta kere nunca mas den mi bida mi lo pasa door di dje, pero e tabata hopi leuk. E tabata sa hopi tocante agricultura dus tabata hopi nice pa papia cune tocante esey.”

Minister Geoffrey Wever tambe tabata presente na e bishita aki y el a splica cu den e programa di e bishita real nan a invita Reina Maxima pa bishita e proyecto aki door cu Reina Maxima mes ta hopi envolvi cu microcredito; y den e caso aki e ta liga cu e fundacion Qredits na Hulanda tambe, p’esey e tabata tin interes pa bin bishita e cunucu aki.

El a informa tambe cu Minister Ursell Arends y su persona a drenta den un MoU cu Qredtis pa establece un fondo di agricultura caminda lo por financia empresarionan cu kier bay den agricultura.

“Semper nos ta bisa nos kier diversifica nos economia, nos ta bisa nos mester di e parti di e food security cu nos mes por produci nos mesun productonan, pero locual semper ta necesario ta financiamento y training. Nos a aloca un fondo di gobierno, hunto cu Qredits y door di envolvimeinto di Reina Maxima, e fondo aki a wordo aumenta y aworaki nos ta trahando cu un fondo di mas o menos 3 miyon florin pa duna prestamo na empresarionan den agricultura,” el a indica.

Minister Wever a sigui splica cu nan ta bay duna prestamo di entre 5 mil y 200 mil florin, cu un interes di 2% pa asina haci agricultura como negoshi posibel na Aruba.

“Nos a haci esey hunto cu Minister Arends, cu ta minister di sector primario, e minister encarga cu agricultura y ami como minister di economia cu ta encarga cu diversificacion di economia y stimula entrepreneurship y nos a haya Qredits como partner cu kier haci esey. Qredits a yuda pa suma na loke gobierno tabatin disponibel pa hisa esaki pa nos por a crea e fondo aki,” el a agrega.

El a remarca cu den e siman binidero nan lo caba di formalisa tur cos cu mester pa empresarionan cuminsa haci peticion pa prestamo.

E meta tras di e bishita di Reina Maxima na Cunucu Koolman ta pa mustra su mahestad con un proyecto asina por crece, y e potencial cu tin pa empresarionan cu kier bay den agricultura por haya un prestamo y bay den siguiente nivel y asina crea mas cupo di trabao, crea desaroyo economico y yega na diversificacion di economia.

Pa loke ta Reina Maxima su reaccion, Minister Wever a indica cu e tabata sumamente entusiasma tocante e proyecto aki. “E tabata conoce e proyecto di nos. Mi a combersa cune durante un bishita cu mi a haci na Merca cu un mision di reino over e proyecto aki y ta p’esey el a pidi pa esaki wordo organisa durante nan bishita. E ta algo hopi personal di dje y e tabata hopi entusiasma pa por a organisa esaki.”