(AP) – Elizabeth Alexandra Mary Windsor no a nace pa bisti e corona, pero destino a interveni.

E muhe cu a bira Reina Elizabeth II lo marca e di 70 aña den e trono riba diadomingo, un reino cu a haci su persona e simbolo di stabilidad mientras cu United Kingdom a navega un era di incertidumbre.

Desde su prome dianan como un hoben real cu hopi glamour, na su encarnacion mas recien como e wela di e nacion, e reina a mira e fin di British Empire, e creacion di multi cultura, e aumento di terorismo internacional y e desafionan cu Brexit y e pandemia di COVID-19 a trece dilanti.

Den un mundo di cambionan sin fin, el a keda constante, representando U.K su interesnan internacionalmente, elogiando e nacion su exitonan y yudando den su fracasonan.

E hecho aki ta duna Elizbeth un honor real manera esun di William the Conqueror, Edward the Confessor y Alfred the Great segun experto den historia real Hugo Vickers. “Semper mi a pensa cu e mester ser yama ‘Elizabeth the Steadfast’,” Vickers a conta The Associated Press. “Mi ta kere esaki ta un manera perfecto pa describi su persona. E no tabata necesariamente tin e intencion di ta reina, pero el a acepta e reponsabilidad aki cu hopi amor.”

Como e yiu mas grandi di rey George V su di dos yiu homber, Elizabeth, ken awo tin 95 aña, tabata premira di biba e bida menor di un real ora cu el a nace dia 21 di april den aña 1926. Cachonan y cabaynan, un bida generalmente normal ta loke a pensa ta su futuro.

Pero tur cos a cambia un decada despues, ora cu su tio rey Edward VIII, a abdica pa asina e por casa cu e Mericano Wallis Simpson. Elizabeth su tata a bira rey George VI, haciendo cu e prinses hoben lo hereda e trono.

Elizabeth a sigui e pasonan di su tata pa medio di ta un ehempel, birando miembro di Auxiliary Territorial Service den comienso di 1945, y birando e prome miembro di e famia real cu a uni na Armed Services como un miembro activo. Riba su di 21 cumpleanos el a dedica su bida na e nacion y Commonwealth.

“Mi ta declara dilanti boso tur presente, cu henter mi bida, sea largo of cortico, lo ser dedica na boso servicio y e servicio di nos gran famia imperial na cual nos tur ta pertenece,” el a bisa durante un programa di radio cu a ser scucha mundialmente.