CITGO Aruba mester ‘slow down’ su proyecto planea pa rehabilita refineria na San Nicolas pa via di sancionnan di gobierno Mericano contra e accionista Petroleos de Venezuela, S.A. (PDVSA). Asina un comunicado di CITGO Aruba ta informa. Gobierno no ta sorprendi, mientras Bon Dia Aruba ta señalando esaki pa basta tempo caba.

CITGO Aruba, un grupo di compañia cu ta opera bou di PDV Holding Inc., mester slow down su projecto planea di rehabilitacion di e refineria na San Nicolas pa via di sancionnan di gobierno Mericano contra e accionista Petroleos de Venezuela, S.A. (PDVSA). E sanccion ta encera cu no ta permiti financiamento adicional pa e proyecto, manera CITGO Aruba ta informa.

‘CITGO a cuminsa e projecto di rehabilitacion di e refineria di San Nicolas cu un vision y compromiso firme pa traha cu gobierno di Aruba pa crea trabou pa e economia local, hisa actividad economico y contribui na seguridad den area di energia den e region’, asina Jim Cristman, Vicepresidente di Refinacion pa CITGO a bisa.

“Maske ta di duele cu nos mester slow down e projecto pa e proximo tempo, nos ta trahando duro riba un solucion y ta spera di por resumi cu ful e projecto den futuro cercano.” Den colaboracion cu gobierno di Aruba y Refineria di Aruba N.V. (RdA), CITGO Aruba ta trahando desde 2016 pa habri e refineria di 209.000 bari pa dia (BPD) cu a stop di produci desde 2012. A pesar di e anuncio di awe, ya e proyecto aki a resulta den construccion di un man camp pa 1.200 trahador y a emplea mas cu 600 trahador, segun CITGO Aruba. ‘Nos ta orguyoso di e progreso cu nos a logra caba y ta desapunta cu nos mester slow down e trabou’, Cristman a sigui ta bisa. “Gobierno di Aruba y RdA a traha den bon cooperacion cu nos den e esfuerzo aki.”

Gobierno a reacciona bisando cu no tabata sorprendi pa tende e noticia, pero si cu e noticia ta duele. Prome minister a declara cu tabata un bon decision pa no inclui entradanan di Citgo den presupuesto.

Historia

Manera nos a bin ta publicando pa algun tempo caba, tabatin señalnan cu a mustra cu e situacion no lo ta bayendo den bon rumbo. Pa algun tempo Citgo y RdA tabata cumpliendo cu pago di trahado pero e sindicato a señala den april 2017 caba cu nan no ta mira e trabou bayendo den bon rumbo Por lesa aki tocante preocupacionnan di sindicato pa loke ta trata pago di contratista despues cu anteriormente esaki tabata bay bon. Y manera nos a publica, e sindicato desde 2017 kier a haya sa di parti di Citgo con lo bay sigui den 2018.

Te hasta e sindicato a bay asina leu di pidi pa bin cu claridad riba e asunto di e refineria pa comunicad, cual no a wordo haci te cu e baca a hoga, metaforicamente. Nos a trece esaki dilanti tambe den editorialnan anterior.