Ultimamente tin varios accident y keho di UTV cu ta pasa riba areanan di naturalesa y ta causa daño na e mata cu tin cerca lantando hopi stof sin tin mester. Den un conferencia di prensa, minister Otmar Oduber (POR) a papia tocante e situacion aki, y regulacion cu ta na caminda.
Un solucion cu e mandatario a bisa cu por lo bin cune, ta pa uza un caminda cu ta designa pa e sorto di vehiculo aki, asina evita pa menos stof/ tera lanta. Algo importante ta cu no ta e vehiculo tin e problema, sino e persona cu ta core e vehiculo.
Tur cos ta depende ‘con e persona ta core’. Pues si ta un caminda stret of ta dicidi di haci diferente maniobra, ta lanta mas stof. Tin persona cu ta haci uzo di dje pa pret. Pa persona cu kier haci maniobra, por destina un area specifico pa core eynan.
E mandatario ta bisa cu a pidi conseho pa atende cu e problema grandi pa e uzo di vehiculo aki. “E ta importante pa turismo, pero di otro banda, ta combati e medio ambiente y siguridad den trafico.”
E conseho ta pa bin cu mas regla pa controla e auto pa wak e tipo di taira, e luz cu nan ta uza, si nan tin keuring y si nan por ta riba caminda.
Tin diferente keho relaciona cu e vehiculo aki. Entre otro, cu e taira cu nan ta traha, cu ta pa ta mas bruto riba caminda di tera, nan ta designa pa core riba caminda ‘off road’, hopi hende ta haci uzo di nan pa e parti atras di e isla.
Un splicacion cu a wordo duna ta cu antes persona tabata core riba jeep, awendia hende ta prefera di djis core e UTVs, anto lo pone condicion pa haci esaki. Tambe lo bin cu reglanan pa e compania di tour cu ta brinda e servicio. Un permiso, certificado of un licencia pa por yuda den e proceso di e persona cu ta dirigi e grupo di tour, asina por controla ken por y no. ‘Tin biaha e guia kier ta popular’, y pa e motibo ey ta core bruto unda tin hende, flora y fauna.
“Nos ta wak cu no ta respeta ora di core riba e santo blanco, bestia cu ta proteha ta wordo mata. Tin destruccion ta tuma luga.”
Director di DNM, Boekhoudt a bisa cu durante e temporada seco, e stof cu ta wordo lanta ta sofoca e matanan cu tin den area. E ta splica cu tin di e mata cu ta wanta, pero ‘hopi di nos mata local nan tin manera di adaptacion’ ora di secura, nan tin rais of un simia, anto ora awasero cay, nan ta crece bek.
Pa e motibo aki tambe a pone e comision di 5 experto cu ta cay bou di DNM, pa asina keda controla, y a haci peticion pa conseho pa e uzo di UTV rond di Aruba, cu ta ocasiona daño na nos medio ambiente.
