Regulacion di Vacation Rentals: Un acto di balansa

Ciudad y regionnan rond henter mundo a adopta un variedad di herment di politica pa regula e mercado di Vacation Home Rentals (VHR). E hermentnan aki di politica ta compaña di efectonan positivo y negativo. E literatura ta identifica tres obhetivo politico principal: alivia e presion di e turismo, proteha e vivienda economico y preserva e bida residencial.

Segun e estudio di e efectonan economico di VHR na Aruba, por logra e obhetivonan politico aki cu diferente herment politico. Un sistema di licencia y registro y su aplicacion ta condicionnan importante pa un politica eficaz.

Politica regulatorio ta hopi diverso den su enfoke. Debi na e hecho cu e aumento di VHR ta bastante recien, e politicanan no ta na vigor pa hopi tempo ainda y a realisa poco investigacion ariba e efectividad di e diferente politica.

Prohibicion total

Prohibicion total ta implica un prohibicion di VHR na henter e ciudad y region. E efecto positivo di e politica aki ta cu tur e posible impactonan negativo di VHR, manera e aumento di e costo di vivienda y interupcion di vivienda residencial, ta ser mitiga.

Di otro banda un desbentaha ta cu e impactonan positivo, manera ingreso adicional di turismo, e posibilidad cu e propietario ta genera ingreso adicional y un competencia mas grandi den e sector hotelero en general, tambe ta wordo mitiga.

Otro desbentaha cu e estudio ta señala ta e riesgo di un VHR clandestino sin supervision ni ingresonan fiscal. Esaki ta loke a sucede na Anaheim (Merca) despues di adopta un prohibicion total di VHR na aña 2018. Un aña despues, debi na e creacion di e mercado clandestino, e ciudad a cambia di politica pa un enfoke mas tolerante den cual e VHR existente por opera teniendo nan mes na reglanan estricto y polticanan di bon bisindario. Pa mitiga e crecemento di e mercado di VHR, ainda tabata prohibi pa cuminsa cu VHR nobo bao e politica nobo aki.

Regulacion di ubicacion

E regulacion di ubicacion ta implica un limite of prohibicion di VHR den cierto area of regionnan designa. E politica aki, e estudio ta splica, ta crea e posibilidad di prohibi VHR den areanan unda e efectonan negativo ta comun y permiti VHR den areanan cu por beneficia di su presencia.

Prohibi VHR na cierto regionnan por distribui e VHR di manera mas igual na henter e ciudad of den un region, reduciendo e aumento den prijs di vivienda y efectonan di bisindario sin un reduccion den turismo (ingreso) pa e ciudad of region den su conhunto.

Un posible riesgo di regula VHR den regionnan turistico ta cu e cantidad di turista por bira menos ora cu VHR no ta presente na e areanan aki. Otro posibilidad ta regula VHR den areanan residencial, si e efectonan negativo di e aumento di VHR ta mas comun den e area en cuestion.

E estudio ta indica cu tin diferente restriccion proporcional cu por wordo implementa pa regula e mercado di VHR. Regula e cantidad di VHR por wordo realisa, por ehemplo, permitiendo solamente un propiedad pa doño, un propiedad pa cada adres of implementando restriccion di densidad, un limite den e cantidad di unidadnan di VHR disponible den un area determina.

E restriccion aki ta afecta inversionistanan comercial cu tin mas cu un propiedad di VHR pa huur, sin afecta e doño di un solo unidad di VHR.

Otro posibilidad ta restringi e cantidad di dia/anochi cu por huur un VHR den un periodo determina. Esaki ta haciele menos atractivo pa opera y ta reduci e cantidad di turista. E desbentaha ta cu por huur e VHR ora cu e demanda y e prijs ta mas halto, manera por ehemplo den weekend of durante high season (temporada halto), locual ainda ta hiba na un cantidad halto di turista y efectonan negativo pa e bisindario.

E desordo, multitud y otro efectonan tambe por wordo reduci restringiendo e cantidad di invitadonan, dus limitando e grandura di e gruponan.

E restriccion di proporcion ta inclui e restriccion di cierto tipo di alohamento, por ehemplo, priva of cambernan comparti den un cas, camber den vivienda protegi pa gobierno of prohibicion di huur casnan completo. E politica aki ta afecta e inversionistanan comercial cu ta converti un vivienda den VHR.

Otro politica cu ta afecta e inversionistanan comercial ta e exigencia cu e cambernan cu ta disponible pa huur mester ta den un cas cu ta ocupa pa nan doño. Ya cu e doño di e cas mester t’ey na e luga, e impacto negativo den e vecindario, manera desordo, por reduci ya cu e doño por tene e invitadonan directamente responsable. Un barera pa restriccion aki ta e dificultad pa monitor e cumplimento.

Otro politica cu por reduci e efectonan negativo di bisindario ta rekeri cierto reglanan di cas cu e invitadonan mester sigui, manera norma pa sushi y desordo.

E estudio ta remarca cu prohibi e no residentenan cumpra propiedadnan residencial ta un herment di politica cu no ta afecta directamente e mercado VHR. Sinembargo, den areanan unda cu hopi di e VHR ta propiedad di inversionista stranhero, e politica aki ta conduci na un reduccion di vivienda residencial cumpra pa inversionistanan stranhero y cu ta wordo converti den VHR.

E politica aki no ta afecta e residente- y propietarionan actual den nan operacionnan di VHR. Pero ta existi e riesgo cu e politica aki por hiba na reduccion di inversion di exterior y di e actividad economico.

E hermentnan di politica cu e ciudad- y regionnan ta usa pa regula e mercado di VHR ta depende di nan obhetivo di politica. E ciudad- y regionnan tin diferente logica pa regula e mercado di VHR. E estudio ta splica cu basa riba un analisis amplio di e problemanan cu diferente ciudad ta enfrenta pa loke ta trata e mercado di VHR, e estudio ta identifica tres obhetivo principal di e politica.

Ariba e base di e obhetivonan politico aki, e ciudadnan a adopta diferente herment politico. Algun herment por ser usa pa diferente obhetivo di politica.

E prome obhetivo ta alivia e presion di turismo. E hermentnan di politica relaciona cu e obhetivo aki ta enfoca den limita e suministro di VHR, cu e meta di reduci e cantidad di turista. Esaki ta inclui introduci un limite of prohibicion den cierto area, por ehemplo areanan turistico.

Si e turismo no ta limita na cierto areanan, un limite di e cantidad di VHR, loke ta resulta den prijsnan mas halto, tambe por ta un forma di reduci e cantidad di turista. E politica mas severo ta prohibi VHR por completo.

E di dos obhetivo di politica ta e proteccion di vivienda economico. Hermentnan pa logra e obhetivo aki den su mayoria ta pretende di limita e comercialisacion di e sector VHR. E hermentnan di politica ta inclui e regulacion di e cantidad di VHR, regulacion di e tipo di alohamento, e ta rekeri cu e cambernan cu ta wordo gehuur ta den un cas ocupa pa e doño y prohibi no residentenan pa cumpra propiedadnan residencial.

E di tres y ultimo obhetivo ta e preservacion di e bida residencial, cu por wordo logra reduciendo efectonan di e bisindario manera desordo, multitud y sushi. E hermentnan di politica relaciona cu e obhetivo aki ta inclui a restriccion di cantidad di invitadonan cu e meta di limita gruponan grandi na lugarnan turistico y areanan residencial.

Molester tambe por ser limita imponiendo reglanan di e cas y exigiendo pa e cambernan cu ta disponible pa huur ta den casnan cu ta ocupa pa e doño di manera cu e doño por dirigi su mes na e invitadonan tocante e comportamento inapropia.

Den e caso di Aruba, e politicanan pa proteha e vivienda economico ta mustra cu ta esnan mas adecua y su aplicacion efectivo ta rekeri.

E estudio ta indica cu na Aruba e efectonan negativo, resultado di e crecemento di e sector di VHR, ta relaciona principalmente cu e aumento di e prijs di vivienda y comersialisacion di e sector.

Hermentnan di politica destina pa mitiga e efectonan negativo aki ta inclui regula e tipo di alohamento, exigi cu e cambernan cu ta disponible pa huur ta den casnan cu ta ocupa pa nan doño y prohibi cu no residente ta cumpra propiedadnan di vivienda.

E politicanan aki ta afecta principalmente e inversionistanan comercial, no residente, den e mercado di VHR na momento cu ta facilita e propietarionan di vivienda residencial obtene ingresonan adicional.

Mirando cu e sector di VHR na Aruba ta comercialisa, e hermentnan cu ta afecta e inversionistanan comercial por tin un impacto significativo den e sector VHR y por lo tanto mester diseña esaki cu cuidou.

Ya ta existi algun politica. E estudio ta señala cu e ordenansa di permiso di Aruba ta rekeri un permiso di alohamento, tin un maximo di 90 dia pa e vivienda of apartamentonan residencial por wordo usa pa efectonan di VHR y un permiso di alohamento ta permiti solamente menos di 10 invitado.

E estudio ta enfatisa cu ta existi e preocupacion cu e aplicacion di e politicanan aki no ta eficaz. E aplicacion efectivo ta crucial pa un politica eficas di VHR.

E hermentnan di politica aplica internacionalmente ta dirigi specificamente na mercado di VHR. Stakeholders di Aruba a haci varios propuesta pa mitiga e efectonan negativo di VHR a traves di medidanan cu ta afecta henter e mercado inmobiliario.

E propuestanan aki ta inclui e apoyo na vivienda economico cu e ingresonan di un tarifa di licencia y restriccion na e propiedad stranhero di bienes na Aruba y garantisa cu e inversionistanan stranhero ta paga un parti husto di impuesto na Aruba.