Alemania a revela un draft di guianan di siguridad ayera pa e rednan wireless di proximo generacion, cual a stop prome cu brohibi Huawei, mientras Merca atrobe a adverti cu lo reconsidera comparti inteligencia cu aliadonan cu ta uza ekipo di e compania Chines.
E catalogo di condicion pa proveedonan di red 5G di Federal Network Agency ta inclui rekeri certificacion di componentenan critico, y sigura cu por confia e fabricantenan, sin menciona pa exclui Huawei en particular.
Huawei a bisa cu a ricibi e movida di gobierno Aleman pa ‘crea un campo igual’ pa proveedonan di 5G, den cual ‘tur proveedo ta wordo ricibi igualmente y hustamente pa participa den construccion di rednan 5G si nan cumpli cu rekerimentonan di siguridad’.
Merca ta purbando di convence aliadonan na Europa pa prohibi Huawei, e fabricante mas grandi di mundo den ekipo di red, tocante preocupacion cu su ekipo lo permiti spionahe electronico Chines, un acusacion cu e compania varios biaha a rechasa. Administracion di Trump a eliina su acceso na tecnologia Mericano na mei ultimo, parti di un pelea geopolitico mas amplio entre Washington y Beijing tocante tecnologia y comercio.
E top diplomatico Mericano pa siguridad cibernetico, Rob Strayer a bisa cu ademas di ekipo pa test y software pa vulnerabilidadnan, gobiernonan tambe mester tuma den consideracion e background di e pais di origen di e fabricante, incluyendo si tin cortenan independiente y si ley ta manda. Oficialnan Mericano ta preocupa cu companianan na China ta rekeri pa coopera cu peticionnan di inteligencia bou di un ley di inteligencia nacional.
“Si tin tecnologia cu no ta confia den nan red, e ora ey nos mester re evalua con nos ta comparti informacion cu paisnan manera Alemania”, Strayer a bisa, maske a agrega cu e no a revisa e reglanan Aleman ainda, cual ta habri pa consulta, y por bira un ley pa fin di aña.
Strayer tambe a elogia un evaluacion di Union Europeo di riesgonan di siguridad di 5G siman pasa, cual a adverti tocante un variedad di menasa cibernetico, incluyendo for di paisnan hostil y ‘actornan cu sosten estatal’, maske a evita di menciona particularmente China of Huawei.
Rednan 5G nobo ta priminti velocidad di download super rapido y reduci retraso di señal, cual por empodera un ola di innovacion manera robot den fabrica y cirugia remoto, pero nan dependencia aumenta riba software ta aumenta e riesgo di atake cibernetico.
