Mandatario encarga cu cultura Xiomara Ruiz-Maduro (MEP) ta adresa e tema di regalonan pa ambtenaar y funcionario politico den cuadro cu su mesun aceptacion di un regalo di parti di Aruba Airlines.

 Despues di tuma nota cu minister di financia, economia y cultura, Xiomara Ruiz Maduro (MEP) a haya un ticket di Aruba Airlines pa bishita isla ruman Corsou su carnaval mirando cu Aruba Airlines ta un patrocinado grandi di nos carnaval, Bon Dia a haya interesante pa trece e topico di regulacion riba duna regalo pa ambtenaar, pero tambe funcionario politico manera parlamentario y minister.

E ta keda un punto interesante pa mira pasobra na Hulanda e regulacion pa e asina yama ‘geschenk’, ta hopi mas avansa na Aruba, unda segun e minister no tin regulacion contra duna regalo na politico, pero si contra duna ambtenaar.

Sra. Ruiz Maduro a expresa cu compara cu Hulanda cual a conoce un trayectorio extenso pa loke ta trata desaroyo di e nacion Aruba, cual ta practicamente existi pa rond di 30 aña como pais, claramente no tin asina hopi cos regla mirando cu ta existi pa hopi menos tempo.  Sinembargo, e minister a señala cu pa ambtenaar esaki ta regula por medio di e ley di derecho di ambtenaar (LMA), unda ta specifica entre otro cu no por duna obsekio ‘pero si nan duna bo obsekio mes e ta wordo regula’.

E mandatario a splica e diferencia entre ambtenaar y funcionarionan politico: Ambtenaar ta un aparato cu ta keda draai, mientras un funcionario politico cual ta encera parlamentario, minister y minister plenipotenciario.

”Politico ta bin y bay, e ta wordo poni aya cu deseo di pueblo, kiermen bo no ta bay mishi cu e deseo ey di es cu kier a wak e eynan. E diferencia cu ambtenaar ta cu e aparato aki ta keda bay cu of sin politico e ta keda traha. P’esey bo mester tin regulacionnan di integridad.” Pero e mandatario ta mustra cu pa politiconan ‘tambe mester tin regulacion asina pasobra como minister bo ta tuma decision’. Na momentonan actual no tin un regulacion pa esaki contra politico, pero sra. Ruiz Maduro a indica cu su colega, esta prome minister den su afan pa trece integridad den gobernacion lo crea un regulacion tambe pa geschenk.

Actualmente esaki ta keda na e huicio na esun cu ta haya e regalo pa ‘asina e ora eynan calcula si e ta algo cu e ta tuma of no. Y si ta tuma esaki mester wak con ta anda cu esaki’.

Pa loke ta trata e mandatario su regalo mes, el a admiti cu el a pensa bon prome cu a tuma esaki. “Pero como cu mi no ta minister encarga cu aerolinea e no ta asina cu mi lo a haya algo en cambio di algo otro.” Segun e mandatario, p’esey a laga pa publica tocante e regalo aki, pa asina subraya e ‘transparencia na pueblo’.

“Pasobra bo por a tuma algo bou man sin laga pueblo sa pa djey nan bin cu critica riba bo. Pero mi ta kere e tempo ta husto pa atende cu e tema aki, cual ta un prioridad di gabinete Wever-Croes hunto cu otro iniciativanan manera ley di patrocinadonan politico.”

Regulacion na nivel di Reino
Manera e mandatario a indica, e regulacion aki ta hopi mas leu na Hulanda, pero e mandatario no ta conoce con leu e otro paisnan den Reino ta cu esaki. Nos lo haci investigacion y lo trece esaki dilanti den un proximo edicion, mirando cu prome minister a indica anteriormente cu lo colabora cu Corsou y Boneiro pa e iniciativa di camara di integridad y cu ‘nan ta hopi mas leu den regla parti di integridad cu nos’.