E registronan di esclavonan di Aruba pronto lo ta digitalisa y asina publico pa tur hende.
Esaki nos partner den noticia, Ret Karibense, a anuncia a base di entrevistanan cu e personanan envolvi den e proyecto di digitalisa e registronan. Un di nan ta Sjoerd Meijer, presidente di Stichting Surinaamse Genealogie. E fundacion aki ya a pone e registronan di esclavonan Surnameño online recientemente.
Sr. Meijer mes a lanta na Aruba y hunto cu Okke ten Hove a traha riba e proyecto unda nan a colecta 498 nomber di esclavonan y nan doñonan na Aruba. Y tambe 7500 nombernan na Corsou. Sr. Meijer no por bisa ainda ki dia nan ta pone esunnan di Corsou online.
E no ta facil pa digitalisa e registronan. Coen van Galen cu a digitalisa e registronan di Surinam, no por a conta riba placa di gobierno. Asina el a haci uzo di crowd funding pa por divulga e nombernan di 80.000 esclavonan. Sr. De Meijer y su colega Ten Hove tambe ta traha riba nan propio gastonan. “E ta di lamenta cu gobierno Hulandes no ta sinti cu esaki ta importante pa inverti den dje. Pero di otro banda, asina bo ta keda cu e libertad y e control den bo man.”
Sr. De Meijer y sr. Ten Hove ta spera hopi interes. “E ta parti di mi, pero tambe di bo historia. Tur famia na Corsou y Aruba, pero tambe na e otro islanan, tabatin esclavo”, asina sr. De Meijer ta bisa.
