Directie Volksgezondheid (DVG) Aruba a anuncia tocante un grupo di experto di Trinidad & Tobago y Merca, kende a acerca cu obhetivo pa inicia un proyecto pa por obtene cifra di pashent cu cancer y tambe pa duna ayudo tecnico.
Eugene Maduro, trahado den e area di epidemologia y investigacion di Departamento di Salud Publico, a laga di conoce cu e proyecto ta pa informa esunnan cu ta traha cu cancer na Aruba kico ta e importancia di bin cu un registro nacional pa Aruba.
Maduro ta splica cu mayoria di biaha ta tende y sa di hopi hende cu ta sufriendo di e malesa. Sinembargo no tin evidencia y no tin cifra specifico cu por bisa ken tin cancer of ki tipo di cancer den cada caso.
Segun Maduro, e proceso aki tabata andando pa par di aña, pero awo ta purba pa wak e posibilidad pa Aruba logra di tin e registro nacional di cancer. Dialuna cu a pasa, e grupo di experto a yega Aruba. Nan tabatin nan prome reunion y a invita diferente departamento den tur area y partido cu tin cuido medico di salud en general na Aruba. Tambe a invita grupo cu ta duna sosten na pashent di cancer.
E grupo di experto Caribbean Public Health Agency a duna presentacion pa mira kico ta importante na Aruba, tambe regional y global, pa locual ta encera un registro di cancer nacional.
Maduro a laga sa cu no ta algo cu a sali for di Aruba, pero cu Nacionnan Uni a declara cu cancer ta birando un problema grandi mundialmente. “Aruba lo implementa e sistema di registro aki pa por tin evidencia con cancer ta comporta su mes na Aruba, ki tipo di cancer ta esun mas frecuente na Aruba, y cu e sistema por calcula cuanto aña di sobrevivencia e pashentnan por tin bibando cu cancer.”
Esey ta e meta di Departamento di Salud Publico. Nan lo skirbi un rapport cu conseho pa Minister di Salud pa haci e registro di cancer bira un realidad. Maduro a bisa cu ta lamentabel cu Departamento di Salud Publico no tin cifra cuanto hende ta wordo diagnostica cu cancer anualmente.
Sinembargo, locual si nan tin ta bista di cuanto hende ta muri na Aruba di cancer. “Nos departamento tin e sistema di vigilancia. Nos por duna cu cifra exacto cuanto hende ta muri na Aruba di cancer. Un di cada cuater persona cu ta muri na Aruba, ta di cancer, y nos ta sigur di esey.”
Nan proyecto lo ta basa riba casonan nobo di cancer diagnostica na Aruba. Por ehempel, si un persona bay Colombia pa haci test y haya su diagnostico, e registro nacional por capta tur caso nobo diagnostica na Aruba, hink’e den sistema y link tur data den otro.
Di e forma aki, e data lo wordo colecta. E idea final ta pa tene tur informacion hunto asina duna un bista con cancer ta na Aruba, mirando cu ‘ningun hende tin un cifra oficial’ y nan kier trece esaki dilanti pa pueblo di Aruba.
