Ayera mainta IBiSA den un conferencia di prensa a anuncia cu inscripcionnan ta bay cuminsa for di mañan 4 di november unda e biaha aki nan ta promove e careda den un forma di Run & Walk pa asina stimula mas hende pa participa.
Asina William Erasmus a señala, e ta fungi como hefe di departamento di desaroyo di IBiSA unda el e enfoca riba e parti pa comunidad participa den actividadnan cu tin relacion cu movecion y ehercicio.
E careda ta bay tuma luga dia 25 di januari di 2023 for di 6or di mainta na Centro Deportivo Betico Croes na Santa Cruz y ta consisti di 10 kilometer den race y 6 kilometer pa e walk and run, Erasmus tambe a indica cu participantenan lo tin 1ora y mey di tempo pa yega, debi cu nan tin cu cera algun ruta pa asina ey nan no lo keda cera pa hopi tempo y no stroba e trafico.
E registracion ta bay cuminsa mañan 4 di november unda personanan interesa por acerca na IBiSA den orario di 8or di mainta pa 12or di merdia y di 1or pa 4or di atardi of tambe por hacie via e website www.beticoloop.com, Erasmus a enfatisa cu si personanan ta wordo registra pero no paga, esey no ta garantisa e participacion den e actividad aki.
Ademas, el a declara cu e biaha aki nan ta trece algo diferente pa asina ey nan por bestel e T-shirtnan na ora, for di mañan 4 di november te cu 11 di november esunnan cu ta registra y paga lo haya e bit y un dri fit T-shirt.
Igualmente, nan ta bay tin opcionnan pa tur hende cu kier participa of den e 10 kilometer of den 6 kilometer, si nan lo kier un finish medal lo tin un opcion unda por paga 10 florin pe.
Despues di 11 di november, e registracion ta bay keda igual pero en bes di haya e dri fit T-shirt ta bay haya un di catuna y e bit.
Esaki ta pa motibo cu nan mester bestel e T-shirtnan den un fecha specifico y nan ta bay tarda pa yega p’esey nan kier evita inconvenientenan pa asina por cumpli cu tur hende.
Pa e aña aki, nan tin e limite di 1.000 persona pa participa den e careda aki debi na siguridad y pa nan por tin e control di participantenan, despues di e cifra ey e registracion lo wordo cera.
Francis Tromp sport coordinator di IBiSA a declara cu den distancia di 6 kilometer e edad cu por participa ta di 15 aña bay ariba y pa 10 kilometer e edad ta di 17 aña bay ariba.
Pa e dos distancia aki lo bay tin premio pa e overall winners masculino y femenino, e top 3 ganado masculino y femenino den nan categoria di edad.
Tur participante cu pre-registra online mester paga na IBiSA sea cash of cu swipe, ora e persona ta registra ta ricibi un e-mail confirmando e registracion y cu e-mail ey por bay na IBiSA y haci e pago, ya cu sin number di registracion no por haci e pago.
Entrega di bit y T-shirt lo wordo anuncia despues manera Tromp a bisa y tambe por bishita nan Facebook page di IBiSA Aruba pa mas detayenan di e careda, como e ruta y otro informacionnan of tambe por bishita e website.
Registracion ta cera dia 20 di januari di 2023 of te ora e participantenan lo yega na e cantidad di 1.000.
Pa finalisa, nan a invita comunidad di Aruba pa uni na e actividad aki unda cu por participa cu nan famia den e 6 kilometer pa asina ey forma parti di un di e prome y mas grandi caredanan di e aña na Aruba.
