Pa motibo di awasero pisa durante e ultimo dianan aki, a keda registra na Peninsula di Paraguana Venezuela un derame di petroleo na refineria Amuay.
Bureau Rampenbestrijding Aruba pa medio di un boletin ta informa tocante e oil spill cu a wordo registra dialuna y diamars ultimo.
Segun e comunicado di Bureau Rampenbestrijdnig, ta wordo papia di alrededor 200.000 bari di productonan incluyendo e combinacion di gasolin y diesel. E comunicado ta bisa cu Departamento Meteorologico Aruba a haci uzo di tecnologia cu nan ta dispone di dje pa asina haci un simulacion caminda a crea un modelo di e coriente di lama pa logra haya un bista di e trayectorio cu e derame aki por tuma. Tambe via e modelo aki nan por a wak si Aruba lo por wordo afecta pa dicho derame cu a sosode. Mirando e distancia entre Aruba y Venezuela ta haci cu Aruba ta keda vigila e situacion aki, pa asina ta prepara den caso di cualkier eventualidad, segun e comunicado.
“Bureau Rampenbestrijding Aruba a haci su contactonan oficial cu RAC/REMPEITC-Caribe kende ta e instancia oficial na unda Aruba ta afilia pa locual ta asuntonan regardando derame di petroleo engeneral. Te cu awe 12 di merdia no tin ningun registracion oficial for di Venezuela na RAC/REMPEITC-Caribe tocante un derame cu lo por a sosode na Venezuela.”
Bureau Rampenbestrijding Aruba kier a informa pa medio di e boletin aki cu a haya informacion tocante un derame na Venezuela, cual no a wordo registra oficialmente pa e canalnan oficial, pero cu Aruba ta vigilando e situacion aki di cerca pa asina ta alerta pa cualkier eventualidad.
Asina cu ricibi mas informacion tocante e derame aki lo nos suministra esaki na prensa pa asina na prensa su turno informa e comunidad di Aruba riba esaki, e comunicado ta finalisa bisando.
