Regis Philbin, e anfitrion genial ken a comparti su bida cu televidentenan cu un koffie mainta pa varios decada, y a yuda su mes y algun fanatico bira rico cu e wega ‘Who Wants to Be a Millionaire’, a fayece cu 88 aña di edad.
Philbin a fayece di causanan natural diabierna anochi, segun un declaracion di su famia, duna pa su vocero Lewis Kay.
Celebridadnan rutinariamente a aparece den e ‘morning show’ di Philbin, pero su curason tabata den e prome 15 minuut, den cual e y co-anfitrion Kathie Lee Gifford – den ‘Live! With Regis and Kathie Lee’ for di 1985-2000 – of Kelly Ripa – den ‘Live! With Regis and Kelly’ for di 2001 te su retiro na 2011 – tabata papia tocante e eventonan di e dia. Televidentenan tabata hari e indignacion falso di Philbin di no a haya e miho mesa na un restaurant, of chansanan di su pareha.
“Hasta ami tin un tiki dificultad”, el a bisa AP na 2008, contestando con e ta haci un show tur dia. “Bo ta lanta mainta bisando, ‘kico mi a haci ayera nochi cu mi por conta? Kico tabatin den corant? Con nos ta bay yena e 20 minuut ey? Mi no ta bay bisa cu semper e ta bay briyantemente, pero di algun forma nos ta conecta mas biaha cu no.”
Ripa y su actual partner, Ryan Seacrest, a referi na Philbin como ‘treciendo su alegria y sonrisa den nos cas tur dia’. “No tin palabra pa expresa completamente e amor cu mi tin pa mi amigo precioso Regis”, Gifford a bisa diasabra riba Instagram. “Simplemente mi tabata ador’e y tur dia cune tabata un regalo.”
Philbin a registra mas di 15mil ora den aire, pa cual el a haya reconocemento den Buki di Record Guinness pa e mayor cantidad di ora di transmision di un personalidad di television, un record cu antes tabata di Hugh Downs. “Tur dia, nos ta kibra e record!” Philbin lo bisa televidentenan. “Un ora mas!”.
E ta laga atras su esposa, Joy, y nan yiunan J.J. y Joana Philbin, como tambe su yiu Amy Philbin di su prome esposa, Catherine Faylen.
