Cirugia plastico mal haci no ta stop di causa alarma na Colombia. Segun Secretaria di Salud di departamento Valle del Cauca, basa riba un estudio di e entidad Medicina Legal y varios fundacion di hende muhe afecta pa procedemento estetico, den e region tin cerca di 3.500 persona cu a laga aplica silicona industrial pa yena, mehora o crea contorno na nan figura.
“E substancianan ey ta peligroso y mucho mas den man di persona no apto pa uza y aplica nan,” e secretario di salud, María Cristina Lesmes, ta bisa.
Pero e preocupacion ta bay mas leu. Segun e funcionario, a adelanta varios operativo di control, cu te na e momento aki a laga 38 establecimento cu sala di cirugia cera, pero ainda tin algun ta opera.
“Riba nos webpage di Gobernacion por haya sa cual ta e clinicanan permiti y cual no, pero nos a topa cu otronan, cu a pesar cu a seya nan luga, ta sigui opera,” Lesmes a indica. Ta calcula cu den e departamento tin 139 ciruhano plastico cu permiso pa haci operacion.
“Nos lo ta severo cu e tipo di sala di cirugia cu no tin nan rekisitonan legal, pero mas ainda cu e 38 establecimentonan di cual nos a cera nan servicio. Si nan kita e seyo pa sigui funciona anto lo tin ciere definitivo y ademas otro sancion,” Dilian Francisca Toro, gobernador di Valle del Cauca ta bisa.
Den e departamento tin ocho persona cu a muri den procedemento estetico den loke ta e aña aki. Tres ta muhe di exterior cu a somete nan mes na cirugia di ‘combo’ y otro tres a fayece a consecuencia di uzo di azeta o silicona industrial.
“E 3.500 muhenan afecta ta rekeri tratamento urgente, ya cu den nan organismo tin un sustancia industrial cu ta produci deformidad y te hasta morto,” Lesmes a declara.
Segun calculo di e funcionario, na Cali ta haci como 30 cirugia plastico pa dia, 150 pa siman, alrededor di 600 pa luna y mas di 7.000 pa aña.
