Reginald Danies ta un persona cu a keda conoci den comunidad pa su lucha contra abuso di mucha. Awe dialuna ta cumpli 10 dia para banda di Parlamento pa duna di conoce cu te ainda e no a haya oido ni contesta pa su metanan.

Durante un entrevista pa Bon Dia Aruba, Danies a relata cu desde aña 2015 el a cuminsa cu e caminda aki pa via di su yiunan. Eel a hiba nan pa e instancianan cu ta trata abuso di mucha, pero na caminda, e proceso a keda pega y e no haya ayudo di movecion.

“Cu tur prueba cu mi tin, cosnan cu mi a paga di mi mes pa hues tin preto riba blanco, na final esey no a yuda”, Danies a comenta.

Loke e ta pensa cu a faya ta e sistema. Un dia el a sinta, yora y pensa cu e lo ataca na unda cu e proceso ta pega, si e tin cu cay cera ta cay cera, pa e por mira kico ta pasando. “Ora cu nan a cera mi, mi no ta haci pa like of share. Ora nan ta bisa mi stop, nan tin cu bisa mi pakico mi a wordo trata menos”, el a señala.

Na e momentonan aki, e yiunan di Danies ta na Hulanda ricibiendo tratamento pa e dañonan cu a haya como victima di abuso sexual, segun loke nan mesun psicologo a bisa Danies. Ademas el a informa cu e tin cu mantene nan leu for di e problema, pa motibo cu e ta bringando pa sa e berdad di Aruba caba. “Mi a wak cu Aruba no por yuda mi y pa mi por bringa, mi tin cu mantene mi yiunan leu.”

El a expresa cu aunke el a haya un entrevista cu gobernador Alfonso Boekhoudt, e no a keda satisfecho cu esey, pa motibo cu loke el a haya sa via Ministerio Publico ta cu “Recherche tin cu investiga y ta algo den sistema cu ta pa yuda e muchanan tambe, ni un hende no por haci nada”, el a bisa.

Segun Danies, e unico hende cu por haci algo ta gobernador Boekhoudt, “pasobra Aruba completo no ta cla pa lanta para pa nan mes.” Tocante e prome entrevista cu a tuma luga algun dia pasa cune, Danies a bisa cu el a papia cu otro fiscal y a splica con e sistema contra abuso di mucha ta kibra.

“Mi kier wak kico ta sali di gobernador, si no tin nada pa sali afo, mi ta bay wak kico ta bay ta mi proximo paso”, el a declara.

Ademas el a informa cu e ta bay keda eynan, banda di Parlamento, te ora cu e haya di dos entrevista cu gobernador of otro persona cu kier scucha e palabranan precies. “Pero mi no ta mir’e y mi tin cu wak ki paso mi lo tuma.”, Mabera e mes a sigura, e sa cu no tin ni un otro caminda na Aruba cu e tin cu bay pa duna nan e informacion cu e tin.

Di e manera aki, el a afirma cu e mester wak kico ta e otro paso cu tin cu tuma, si e no ta haya gobernador. “Pa motibo cu mi ta mas pasivo cu por ta posibel, pa no por bira un tiki agresivo y e ora ey si mi no sa mas”, Danies a expresa.

Manera a keda conoci, Danies a cay cera varios biaha debi na e manera con e ta lucha desde basta tempo caba contra abuso di mucha. Durante tur e dianan cu e ta para banda di Parlamento, el a comenta cu polis mes no ta yega eynan y ora nan ta pasa, nan no ta bisa nada. “Nan ta pasa y ta cuminda mi so”, Danies a afirma.

Tocante e apoyo di comunidad, el a sigura cu e ta hayando e sosten di Aruba cu e mes no por kere. “Esun cu mi no por kere ta yegando cerca mi, victimanan di abuso sexual ta bin cerca mi, ora ma pensa cu mi tabata mi so, mi no ta mi so”, Danies a declara.

“Mi no ta para akinan pa pidi ayudo di ni un hende, ma bin cu un meta y cu mi curason pa caba cu e cos aki”, el a expresa.

Den luga cu Danies tin 10 dia, cu ta banda di parlamento, el a menciona cu te ainda ningun politico a bay cerca dje, pero coordinado di nan si. Nan a bis’e cu e tin un chens di haya un reunion cu algun minister, pero cu te ainda e no sa precies cu ken. Tambe di algun fundacion cu e no a bisa su nomber como tambe el a laga sa cu mester warda un rato pa motibo cu e tin otro metanan.