Segun Sr. Reginald Danies, e video cu Minister Paul Croes a saca recientemente contra abuso di mucha ta pinta un otro pintura cu e realidad. ”Si no atende cu e asuntonan aki seriamente awo, bo ta bay haya bo mañan cu yen drogadicto y alcoholico cu ta bay busca un escape for di nan problema tur fin di siman. Esey bo ta bay haya bo mañan cu ne anto p’esey mester compronde con serio e cos aki ta”, Sr. Danies ta bisa.
Sr. Danies ta splica Bon Dia cu gobierno ta haci manera tur cos ta canando bon pa calma e cuenta y manipula hende. Sr. Danies ta agrega cu e ley pa abuso di mucha mester pasa y cuminsa cana manera mester ta y no manera ta pasando actualmente cu ta entrega keho pa despues wordo ignora anto benta un banda pa warda. Sr. Danies ta agrega riba e echo cu den su caso e mes mester a percura pa busca un psycholoog anto e mes mester paga pa un cual e ta comenta cu no ta un problema pero e pregunta ta lanta: con esnan ta haci cu no por paga esaki riba nan mes? ”E proceso ta tarda mas por ehempel pa esun cu no tin placa pa paga un psycholoog riba su mes anto e cos no por bay asina”, Sr. Danies ta comenta.
Sr. Danies ta agrega cu si e ley aki pasa, cu mas facilidad hendenan por bini pa dilanti y trece keho of papia si na prome instante nan no tabata por pa motibonan laboral of algun otro motibo personal.
”E fecha cu Fiscal Kardol a duna mi e dia cu mi tabata cera, e kemen cu mi cu ta te dia 29 augustus of rond di fin di e luna di augustus e ta bay yama Juancho pa dilanti, pero mirando con aworaki caba con ami mes ta pagando psycholoog pa mi yiu, mi ta bisa ora mi yega eynan ta con hues ta bay pidi mi pa rapport cu ami mes ta paga? Si e cos ta den e sistema, ta asina e mester bay, e psycholoog mester traha conhuntamente cu e fiscal pa nan wak cuanto castigo tin cu wordo duna”, Sr. Danies ta splica cu e no mester di fama ni ta purbando di haya mas atencion ta djis cu e ta sinti como cu no solamente den su caso, pero den henter e asunto di abuso contra mucha no ta wordo tuma na serio y semper ta bin cu un video of propaganda pa purba sconde e realidad. Bon Dia ta purbando di tuma contacto cu Minister Paul Croes pa un comentario pero no a logra ainda.
