(eLnACIONAL/Infobae) – “Si mundo kier aplica sancion, nos ta convoca eleccion. E pueblo aki tin derecho di dicidi su propio destino“, Diosdado Cabello a declara den asamblea nacional constituyente, cu no ta reconoci pa oposicion y pa comunidad internacional.
“E constituyente ta acorda convoca den prome cuatro luna di 2018 e proceso di eleccion presidencial”, el a afirma. E periodo aki ta termina dia 30 di april, asina cu e Chavistanan ta pretende celebra eleccion prome cu e fecha aki.
Segun El Nacional, e eleccion tabata programa pa fin di 2018 pero cu e decreto aki ta modifica e calendario electoral. No ta e prome biaha cu esaki ta pasa, pasobra aña pasa eleccionnan regional cu tabata di tuma luga na december, a move pa october. E cambionan aki ta pa duna bentaha na e partido Chavista.
En realidad e anuncio aki ta pone un banda e negociacionnan cu e regimen y oposicion tabata tene na Santo Domingo, Republica Dominicana, ya cu un di e exigencianan di MUD tabata e reforma di e conseho nacional electoral (CNE) pa instala un poder electoral imparcial cu por garantisa e proceso electoral. E decreto di e constituyente no ta modifica CNE, cu ta completamente na fabor di e regimen di Nicolas Maduro.
