(Infobae) – E corant Nicaraguense La Prensa ta presentando na organismonan, gobiernonan y institucionnan internacional un rapport detaya cu e agresion cu nan a sufri di parti di e regimen di Daniel Ortega y Rosario Murillo, como un causa cu lo por yega na tribunalnan internacional, segun loke Eduardo Enriquez editor hefe di e corant a bisa.
E regimen di Nicaragua a cuminsa un persecucion implacable contra e corant di mas antiguo di Nicaragua, loke a causa e tuma militar di su instalacionnan y ekiponan, e detencion di tres miembro di su directiva y dos trahado, su redaccion completo ta na exilio pa asina preserva nan libertad y por sigui informando a traves di nan plataforma digital.
Dialuna ultimo La Prensa a denuncia cu regimen di Daniel Ortega ta bay cuminsa usa e edificio y e imprenta cu ta comercial y di nan mes, un accion cu e corant a califica como “hortamento”.
“Den ultimo dianan, La Prensa a ricibi informacion extraoficial cu Regimen di Ortega y Murillo a recontrata e persona specialisa den e maneho di imprenta comercial. Ademas, a adkiri e materialnan pa e funcionamento di ekiponan di e compania”, nan a informa mediante un comunicado.
“Esaki ta robo pasobra nunca a existi un base legal pa hustifica e ocupacion di edificio ni di e mashinnan”, Enriquez a bisa. “Ni sikiera ta existi base legal pa condena Juan Lorenzo e gerente general, pasobra nan ta papia di labamento di placa pero nan no a purba esey, ni na Lorenzo ni na La Prensa”.
E corant La Prensa a ser funda na 1926 y ta e medio di comunicacion mas importante den historia di Nicaragua. A sobrevivi atakenan di tres dictadura.
Dia 13 di augustus di 2021, polis a drenta den edificio e cual a bin permanece ocupa pa militarnan for di un aña pasa, ora e regimen a anuncia e inauguracion di Centro Cultural y Politecnico Jose Coronel Urtecho den e luga aki.
Di acuerdo cu e corant, e balor di e bienesnan di La Prensa ocupa pa e regimen ta yega entre 18 pa 20 miyon dollar.
