Empresa di mensaheria (postorder) cu ta opera na Venezuela a alerta tur nan cliente cu aduana di Venezuela, a prohibi e ingreso di medicina y tur cos cu gobierno di Nicolas Maduro por considera como material di guera, pa manifestantenan di oposicion, cu tin mas di dos luna den plan di protesta riba caya na Venezuela.
Instrumento di metal manera ‘resortera’ (stichi), kiniki, helm, jacket anti-bala, bate y bala di baseball, mascara contra gas, guante (handschoen) y producto di prome auxilio manera antiacido, gasa, crema pa kemadura, verband y gota pa wowo, ta algun di e articulonan cu aprohibi. Tur producto excepto bate y bala di baseball, y stichi cu kiniki, tanecesario pa detene e atake brutal di banda di autoridad policial y militar, y otro grupo chavista.
Venezolano cu ta bibando den stranhero a organisa nan mes pa asina manda ayudo pa nan compatriotanan, en vista di e necesidadnan y e poco cuminda y medicina cu tin na Venezuela awor. Mayoria di producto a ser manda desde Merca y Panama. “Nan no lo usa aduana di Venezuela como un brug pa duna arma na grupo terorista” , José Cabello, presidente di SENIAT a skirbi den un comunicado.
Desde cu a cuminsa cu e serie di protesta contra gobierno di Maduro na luna di maart, miles di hende di oposicion ta bringa contra forsa di seguridad dia tras dia, den bataya entre truck cu ta lansa awa y grupo anti-motin cu bom lacrimogeno, como tambe manifestantenan cu escudo di palo, stichi y antiacido riba nan cara pa asina evita efecto di gas lacrimogeno.
Regimen di Maduro ta sigura cu den e protestanan, caminda 73 persona a muri te awor, e unico obhetivo ta saca Maduro for di poder. Gruponan di oposicion ta acusa “Maduro di a bira un dictador”, y nan a bisa cu e unico manera di finalisa e crisis politico y economico ta e salida di Maduro for di presidencia di Venezuela.
Na Venezuela ta opera empresa local di mensaheria, hunto cu empresanan di Merca manera FedEx y UPS; y DHL, cu sede na Alemania.
El régimen de Maduro prohibió la importación de medicamentos para manifestantes
