Ta temporada di fin di aña, y nos por ripara cu tin preocupacion atrobe. Preocupacion di e gremionan empresarial por ehemplo cu den loke resta di e luna aki, ainda por tin regalo pa nan di e tipo cu nan ta prefera di no haya… E cambionan legal cu ta implica costo di operacion extra pa tur empresa. Ta dificil pa no mustra comprension pa nan posicion, si acaso gobierno tabatin pensa di bin cu cambio pa aumenta tarifa di un o algun ley pa aumenta entrada pa por cumpli cu e gastonan programa pa otro aña.

Pa bisa berdad te awor nos no por bisa cu gobierno a duna indicacion di esaki. Hasta a duna di conoce cu e afamado ‘Sugar tax’ no tabata necesario pa cera presupuesto. Pero esey aparentemente no a logra calma e empresarionan cu ta argumenta cu nan ta planea aña cu bastante anticipacion, di seis luna of mas. Ironia ta cu normalmente gobierno tambe ta traha asina, unda pa juni di cualkier aña ya mester tin un draft definitivo pa e siguiente aña. No ta pornada tur aña pa fin di januari e departamento y ministerionan ya mester tin un idea di kico e siguiente aña lo trece pa nan. Naturalmente nos por ripara cu na varios ocasion e trayecto ehemplar ey ta keda na un bunita teoria, pero di cumpli, nada.

Naturalmente gobierno lo por indica varios obstaculo cu ta haci planificacion problematico. Un di nan ta e continuo consulta cu e supervision financiero. Di otro banda, tin e problema, cu e gremionan menciona tambe ta trece dilanti, di e reforma fiscal, unda cu no ta conoci kico ta bay e proximo pasonan, pa nan por tin un claridad kico ta bin pa nan y con nan ta adapta na esey. Enfin, nos ta kere cu e asunto aki lo no haya claridad por lo pronto, pasobra ta parce cu gobierno mes a hinca su curpa den un ‘callejon sin salida’ sinta actualmente cu diferente opcion, di cual tur ta mustra inatractivo. Sigur cu esaki no ta un ‘beauty contest’ unda ta scoge esun cu ta mustra miho. E escogencia por ta di un BTW (Value Added Tax) cu nunca a haya sikiera algo di popularidad, ni cerca gobierno ni e gremionan. Ta keha semper cu e ta asina complica y ta trece hopi trabao cune… Bo ta puntra bo mes si ta loco hende ta na otro paisnan pa adopta e sistema aki… O nan sa algo cu nos no sa? Pa colmo, IMF tin añas ta recomenda e sistema di impuesto aki, motibo obvio pa nos gobierno(nan) pa rechasa esaki. Logico, pasobra ta ki dia nos a mira gobierno ta sigui recomendacion di e tipo di entidad internacional aki?

A contempla tambe e sistemanan den uso na Bonaire y Curaçao. Na e ultimo isla aki nan ta introduciendo na maart proximo e sistema ‘ABB’ di Bonaire, cu ta encera un cobransa ‘na porta’. Cu e bentaha cu cuerpo di aduana ta cobra implicando menos trabao administrativo y un fluho financiero fuerte pa gobierno, cu bastante stabilidad. Desbentaha: ministro di e tempo ey Bermudez kier a introduci esaki na Aruba, pero e lider di gobierno anterior a ‘kill’ e idea, pa motibo di e porcentahe halto, pues no atractivo politicamente. E OB di Curaçao ta keda descarta awor cu e isla aki mes ta bandona e sistema ey. Kico ta resta anto? Keda cu e BBO? Si esey ta e caso, anto unda e ‘reforma’ ta? Ademas, keda cu e BBO ta trece cierto riesgo cune, si pensa na aumenta e porcentahe mas ainda. E efecto inflacionario ta birando mas fuerte segun e porcentahe ta subi. Logico, pasobra den producto cu a pasa den dos o tres link, 3% riba 3% ta bastante menos cu 6% riba 6%, pa no papia di porcentahe mas halto.

Otro candidato pa stimula inflacion lo ta e posible aumento di salario minimo. Conseho di SER a bay pa gobierno caba, pero e rapport no ta publico ainda. E conseho lo ta di 4%, segun nos a comprende. Cuidao cu no ta bay ripiti e hazaña di algun aña pasa, unda a opta pa warda aña cuminsa pa introduci e aumento, cu pa ley mester keda introduci na inicio di aña, esaki pa e aumento cu ta basa riba inflacion pa e periodo di augustus di e aña anterior te augustus di e aña aki.

Pero nos ta descubri otro preocupacion. Y esey ta cu nos ta papia solamente di e opcionnan cu gobierno tin o ta mira pa aumenta entrada… Unda austerisacion a keda? Realmente nos no ta mira tanto esfuerso pa baha gasto. Nos ta comprende cu e costo di e proyectonan grandi cu nos mester bay paga ta pisa grandemente riba presupuesto, pero esey mester ta un motibo mas pa busca forma pa reduci gasto? Cu mas di 8.000 salario pa produci tur luna, nos a yega ‘the bloody limit’ di loke finanzas publico por carga. Nos no tin duda cu e ministro en cuestion ta comprende esaki; ta bira tempo pa e sindicatonan cu ta representa empleado publico cuminsa comprende un par di cos den e pais aki. Por ta cu nos por haya otro tipo di regalo e aña aki?