Manera cu nos tur por a tuma nota ultimo tempo nan tin hopi noticia tocante e refugiado nan saliendo fe Syria, Afghanistan y Iraq crusando laman grandi pa yega na e isla nan di Grecia of Turkiya.
E crusada aki ta un sumamente peligroso y hopi di nan no ta ni logra yega. Hopi di e boto nan ta mucho chikito pa e cantidad di hende nan cu ta abordo, y ta zink. Hopi di e hende nan no sa landa of tin yiu chikito nan cu nan tin cu zorg pa yuda prome. Famia nan tur huntu ta subi e boto nan aki rumbo pa Europa, buscando un manera pa cuminsa un bida nobo. Si nan logra yega, nan ta wordo considera refugiado, como cu nan pais ta peligroso y den guerra e ta permiti pa nan keda Europa legalmente y purba haya miho oportunidad nan pa keda biba eynan. Pero fe 2014 ya tin hopi a crusa y yega Europa, ta e anja aki a haya cu un cantidad a cuminsa bay mas y mas, y tur ta yegando parew. Causando cu Europa ta hayando nan mes cu un cantidad di hende cu nan tin cu bay yuda y asisti. Hopi di e refugiado nan aki ta wordo mal trata, discrimina, y ta wordo mira como hende nan malo. Poniendo cu asina hende ta haya rabia riba nan tambe, paso nan ta wak e manera un “invasion” di nan pais. Mientras cu unico cos e hende nan aki ta pidi pe ta siguridad, algo cu nan no tin na nan pais. Pa un famia dicidi di pone nan mes y nan yiu nan na un riesgo grandi asina di hoga of muri, ta hopi teribel e situation na nan pais mester ta, un cu nos mes aki na Aruba no por ni cuminsa na imagina. Nan ta tuma e riesgo paso nan sa cu loke ta warda nan na Europa, ta hopi miho cu loke nan ta aden awo. Varios pais Europeo no kier duna nan e permiso pa keda na nan pais, solamente pa pasa y sigi cu nan destino oficial. Manera ta comprondi, hopi di nan lo bay Alemania y Denamarka, cu si ta “willing” pa tuma e refugiado nan aki. Merka su rol y ayudo den esaki ta hopi “low key” te ainda, mirando cu normalmente situation nan andando mundialmente cu hopi atention ta pidi tambe pa e atention y ayudo di Merka, den e caso aki nada oficial no a pasa ainda cu esey. Prome cu juzga of mustra rabia riba e hende nan aki, ta bon pa corda cu cada un a pasa den algo pa yega caminda nan ta, nos tur ta humano y e “basic needs” di un humano, ta algo cu nos tur merece, unda cu nos ta. Si un cos asina ta pone cada humano bira lomba pa e otro, y toch nan lo bisa cu nan ta desea paz na mundo? No ta asina e lo cuminsa? Purbando di biba uni, purbando di yuda otro. No tur ora e ta facil of cu nos ta compronde otro, pero yudando un hende no tin cu costabo nada, paso na final di dia, e refugiado nan aki a bay di nada pa nada atrobe, e tiki cu nan por haya awo fe cualkier persona of ayudante ta mas cu hopi pa nan.
