Cruz Cora cu ayudo di Hulanda a yuda como 90 mil hende durante e periodo mas dificil di COVID-19

Relato anual di Ministerionan pa Relacionnan di Reino y Asuntonan Exterior pa 2021 ta lanta pregunta cerca Parlamentarionan Hulandes y e siman aki Secretario di Estado Alexandra van Huffelen y Minister pa Asuntonan Exterior Wopke Hoekstra a duna nan contestanan.

Asina a puntra specificamente riba con por papia di e Organo Caribense pa Reforma y Desaroyo, COHO y ta ehecutando proyectonan, si e proposicion di ley di consenso COHO ainda ta den tratamento? Van Huffelen a ricibi e preguntanan di comision permanente pa Relacionnan den Reino di Tweede Kamer riba diferente topico. E pregunta riba COHO tabata referi na e ley Relacionnan di Reino y Fondonan BES 2021.

Segun van Huffelen,den e areglo interno ‘landspakket Aruba’ como tambe e landspakketnan pa e otro paisnan den Reino, a palabra cu Hulanda cu pendiente e introduccion di e ley di consenso di Reino COHO, lo traha cu e organisacion di trabao temporario, TWO, cu a keda institui pa Ministerio pa Asuntonan Interno y Relacionnan den Reino. Di e forma aki e organisacion temporario, cu despues mester traha luga pa COHO, conhuntamente cu e paisnan por a cuminsa ehecuta e palabracionnan den e landspakketnan. E proyectonan cu ta andando y ta den ehecucion awor ta resultado di e palabracion aki. Gobierno di Hulanda a pone medionan disponibel despues cu a yega na e palabracionnan concreto riba e landspakketnan, pa asina COHO por facilita e reformanan cu ta describi den e diferente paketenan. “E proyectonan cu awor ta den ehecucion no ta bao encargo di COHO, sino di e TWO, pero e fondonan ta procedente di e presupuesto pa COHO.”

Temanan landspakket ta basa riba IMF y CAft

Tambe tabatin pregunta riba cua criteria y indicadornan a aplica pa determina e medionan financiero pa e proyectonan den e landspakket. E Parlamentarionan Hulandes tabata kier sa si esakinan ta disponibel y cua ta e cuadro di evaluacion cu a usa pa duna contenido na e temanan di reforma. Riba cua forma a haci e asina yama ‘nulmeting,’ esta e analisis basico cu ta cana prome cu implementacion di e landspakketnan.

Aki van Huffelen a ilustra cu e temanan di reforma cu ta describi den e landspakketnan ta basa grandemente riba conseho y cuadronan di evaluacion di organisacionnan internacional manera Fondo Monetario Internacional, IMF y e consehonan di e College (Aruba) Financieel Toezicht, CAft. E medionan financiero necesario pa e proyectonan den e landspakketnan no a keda determina integralmente prome cu a cuminsa cu e trabaonan. Esaki, segun van Huffelen, no tabata posibel pasobra tabata falta informacion necesario pa esaki. Mayoria di e reformanan den e landspakketnan ta cuminsa cu ehecucion di revisionnan of e nulmeting. Basa riba e resultado di e proceso aki por determina cua medida concreto ta deseabel. Y asina ta determina e prioridad, planificacion y coherencia, y kico tur esaki ta nifica pa ehecucion. Di e forma aki tambe por stipula e indicadornan di prestacion cu mester ta mara na ehecucion y kico nan influencia riba presupuesto lo ta.

90 mil

Locual tambe a keda discuti ta e asistencia cu Hulanda a duna na personanan cu tabatin mester di ayudo di cuminda durante e prome lunanan di e pandemia di coronavirus. E parlamentarionan Hulandes tabata kier sa cu tabata e criteria cu a usa pa determina e cantidad di persona cu tabatin mester di ayudo, y a base di cua calculacion a haci e pronostico di ayudo. Finalmente tabata kier mas claridad riba e cantidad real di personanan den necesidad.

Segun Secretario di Estado Alexandra van Huffelen, na momento di a evalua si personanan por a yega na remarca pa sosten di cuminda, a mira entre otro na nan entrada, e situacion di famia y e vulnerabilidad. “Por pensa aki na un mama soltera y sin trabao cu mas yiu. E trahamento di pronostico di e cantidad di personanan cu tabatin mester di ayudo ta dificil, pasobra ningun hende por a predeci con e pandemia lo cana. Ora cu e presencia di COVID-19 a bira menos riba e islanan y turismo a bolbe lanta, a nota un caida grandi den e necesidad pa brinda sosten. Hopi di e hendenan aki por a haya un trabao. Cruz Cora en todo caso a percura pa como 90 mil hende por a ricibi sosten di cuminda,”tabata locual Alexandra van Huffelen a informa Parlamentarionan Hulandes.

Venezuela

Ministerio pa Asuntonan Exterior di Hulanda tambe a entrega su relato anual pa 2021 y aki e comision fiho di Asuntonan Exterior tabatin pregunta specifico pa e Minister relaciona cu Venezuela. Tabata kier sa ki rol Hulanda tabatin como guia den e proceso di negociacion pa Venezuela. Minister Wopke Hoekstra a bisa cu Reino Hulandes, riba invitacion di oposicion Venezolano tabata presente como observador (na nivel di ambtenaar) na diferente ronda di palabracionnan cu a tuma luga na Ciudad di Mexico. E meta y agenda di e proceso di negociacion entre e regimen di Maduro y oposicion Venezolano ta den un Memorandum of Understanding cu ta publico. Pero pa motibo di e caracter di confianza di e negociacionnan y palabracionnan cu a haci cu e facilitador di e proceso cu ta Noruega y e partidonan envolvi, Hulanda no ta permiti pa amplia riba e proceso mes ni duna un splicacion specifico riba e papel cu ta hunga den esaki.

E negociacionnan a keda posponi na October 2021 pa e regimen di Maduro. Y aunke cu di e tempo ey ta papia di e posibilidad pa cuminsa e proceso di nobo, te ainda esaki no a sosode. Parlamentarionan Hulandes tabata kier sa con Hulanda como acompañante na e proceso a contribui na e desaroyonan. Segun Minister. Reino Hulandes ta keda dedica na e buskeda pa solucion di e crisis politico, humanitario y economico na Venezuela y como tal, ta dedica su mes activamente den comunidad internacional pa sostene e proceso di negociacion Venezolano. “Pero pa motibo di e palabracionnan entre e partidonan negociado y e facilitado Noruega, no ta posibel pa splica kico ta e contribucion di Hulanda te cu awor,” e Minister a enfatisa.

Trato migrante Venezolano

Un tema cu cada biaha ta lanta cabez na Hulanda ta e trato cu Venezolanonan ta ricibi na Corsou. Parlamentarionan Hulandes tabata kier sa di con no ta splica e contribucion di Hulanda na e falta di siguridad di Venezolanonan na Corsou, ya cu a duna sosten na e pais riba tereno di cuido di frontera y detencion.

Minister Hoekstra a bisa cu e relato anual di Ministerio pa Asuntonan Exterior di Reino ta bay riba e papel y tarea cu e Ministerio a ehecuta. Y e Ministerio pa Asuntonan Exterior no tin un responsabilidad of papel directo pa loke ta Wardacosta di Reino Hulandes den Caribe. Tampoco tin un papel den e asistencia cu Gobierno di Hulanda a duna na Gobierno di Corsou den cuadro di detencion di stranheronan.

“Wardacosta ta un organisacion di mantencion di ordo civil di e cuater paisnan den Reino, unda e tarea hudicial y di investigacion ta cay pa responsabilidad di e Procuradornan General di Aruba y esun encarga pa Corsou, St. Maarten y islanan BES. E migrantenan cu keda deteni riba lama pa Wardacosta ta bay na un di e tres puntonan di sosten maritimo, cu ta na Corsou, St. Maarten y Aruba. Eynan ta baha e migrantenan na tera y nan ta pasa pa responsabilidad di organisacionnan policial di e paisnan. Wardacosta pa area di Caribe ta trata e migrantenan deteni na un forma humano,” Hoekstra a splica. E Minister a sigura cu Ministerio pa Asuntonan Interior y Relacionnan di Reino ta trahando riba ehecucion di plannan pa expansion y mehoracion di e facilidadnan di detencion di stranhero na Corsou.