Cu cierto interes nos a tuma nota di e comentarionan di e politico/ex-ministro cu recientemente a bolbe riba e escenario aki, tocante e necesidad pa gobierno baha gasto di e aparato gubernamental. E parti positivo ta cu e ta na fabor pa en berdad baha gasto. E parti menos positivo ta cu loke e ta trece na mesa no ta asina impresionante. Por ehemplo, den pasado caba el a trece dilanti cu por baha gasto a traves di privatiza cierto servicio cu gobierno ta brinda y pasa esakinan pa entidad cu no ta responsabilidad di gobierno mas. No ta bay pa critica e vision aki sin mas, pasobra sigur tin servicio unda por pasa pa privatisacion, cumpliendo alavez cu e requisito di mehora servicio na e cliente, tumando de paso e medidanan pa aumenta eficiencia y eficacia den e entidad privatiza. Esaki sin embargo ta algo cu no ta logra sin mas y ademas si no tene cuidao, e creacion di mas entidad privatiza no ta mas cu un instrumento politico pa duna mas aliado politico puesto bon paga y sigura, tanten e padrino politico ta na mando. Ta mas cu claro cu e ultimo aki no ta loke nos mester.
Tambe lo mester tuma na cuenta cu, a pesar cu por saca cierto servico for di bao hala di gobierno pa bon motibo, e gran mayoria di servicio, y e cantidad di empleado publico cu ta envolvi den esaki, ta keda existi. Esaki ta unda e esfuerzo grandi di baha gasto mester tuma lugar y loke nos por mira den ultimo añanan ta net lo contrario, unda actual gobierno a mustra un maestro den inventa servicio nobo, cu pa colmo ta ser poni apart mientras cu esey no ta necesario. Aki atrobe ta lanta e sospecha cu esaki ta sucede tambe pa crea mas puesto di honor pa duna na esnan cu ta pertenece na famia y amigo di e gobierno. Contal cu e desaroyo aki no ta yuda pa realmente baha gasto di operacion di e aparato publico.
Awor, pa bay directamente na curazon di e problema, kico ta realmente mester sucede pa logra e aparato publico eficiente y servicial, cu ta haci loke mester haci sin ta o bira neishi di faboritismo politico y di corupcion? Pa cuminza, ban stop di papia di baha gasto y pone mas enfasis riba e reforma y mehoracion di funcionamento di e aparato, cu no semper ta hiba nos na baha gasto, aunke e ultimo aki ta keda un meta primordial, pero no mas importante cu reforma pa mehoracion. Pa pone den palabra simple: kico publico tin na un aparato cu ta funciona bon, tecnicamente, pero no ta accesible pa e ciudadano? Di e manera ey nos ta keda paga impuesto pa algo cu no ta yuda nos como ciudadano. Esaki ta algo cu nos por ilustra bon cu e desaroyo di ultimo añanan den gobernacion mes. Por constata cu bao presion hulandes nos por a mira cu gobierno a haci un esfuerzo pa mantene e gastonan di personal bao di e limite stipula hunto cu Hulanda. Esaki a bay acompaña tambe pa un reduccion modera di e cantidad di empleado publico. Noo cu esaki ta yuda tanto pasobra si no ta para e crecemento automatico di payroll cu e famoso ‘periodiek’ banda di promocion y sin control efectivo riba p.e. overtime, cu tempo ta bira dificil pa mantene control riba gasto. Pero, tur esey ainda no ta toca e mero curazon di e asunto: keto bay nos ta papiando cantidad na lugar di calidad. Aki ta unda e storia ta bira mas tristo ainda pasobra salvo algun ehemplo positivo, nos no ta mira un esfuerzo organiza y planifica di gobierno pa mehora su operacion. Loke por mira ta intento individual cu no ta parce elemento di un plan mas general, y den cierto caso ta parce mas bien resultado di e presion Hulandes, entre otro den cuadro di e Landspakket unda gobierno ta mara na e acuerdonan haci bao capa di e Areglo Mutuo cu a reemplaza e COHO. Por ehemplo, esaki ta e caso den e introduccion di e sistema nobo di evaluacion y promocion, cu riba su mes ta un bon paso, pero inmediatamente a keda posterga pa loke ta su implementacion den practica, lagando e interogante ki dia realmente lo cuminza usa e instrumento aki. Suficiente pa constata cu lo tin hopi presion, for di sindicato y di den e propio partidonan, cu lo topa cu hopi caso di privilegio y patronahe cu no ta cuadra cu e forma nobo di evalua. Lo ta bon pa tuma na cuenta loke IMF ta sugeri den su ultimo informe, pa banda di aumenta capacidad di Bureau Integriteit, introduci un codigo di conducta pa empleado publico y…, “detailed asset declarations from senior public servants.” Nan a cuminza mira tambe unda nos problemaman ta?
Nos mester bisa tambe cu ta riba e ultimo tereno aki, nos no conoce e ex-politico cu a bolbe como un persona cu ta boga pa loke nos a caba di describi como necesario, mas bien e tambe ta pertenece na e cultura politico bieu di patronahe y privilegio pa amigo. Cu esey nos no ta bisa cu den su practica desde awe e lo sigui cana e mesun caminda bieu ey, pero esey ta loke futuro lo mustra y ta den su man pa haci esey. Contal cu e asunto di reforma gobernacion no ta un simple asunto di baha gasto, y aparentemente no ta tur ta comprende esey.
